NYD gilusad sa Simbahang Katoliko

Ang anunsiyasyon sa Birheng Maria ang nagsilbi nga inspirasyon sa composer sa paghimo sa theme song alang sa umaabot National Youth Day nga ipahigayon sa Sugbo sa Abril sa sunod tuig.

Ang kanta nga giulohan og “Servants of the Lord,” gibuhat ni Rev. Fr. Vincente Felisida Amplayo, OSA, uban sa arranger nga si Nendel Endrina; vocal arranger, Jay Arr Felisida Librando; ug interpreters nga sila si Leela Laburada, Noel Zapanta, Mayrelle Masalta, Thomas Castañarez, ug Jay Arr Felisida Librando.

Niadtong Sabado sa gabii, opisyal nga gilusad ang NYD pinaagi sa Hudyaka 2018 nga gipahigayon sa IC3 Convention Center nga ang tumong mao ang pagpakita sa nagkadaiyang talento sa kabatan-unan ug aron usab makahipos og pundo alang sa dakong kalihokan.

“Actually, that was based on the gospel, unya kato pong sa bridge nga niingon ang the blessed mother said, do whatever he tells you. The rest of the verses are Augustinian inspired ideas.” dugang ni Amplayo.

Sa Hudyaka, gipakita usab ang opisyal nga logo sa NYD 2019 nga dinasig gikan sa Birhen Maria ug naporma pinaagi sa pagtinabangay sa mga batan-on.

Si Archbishop Jose Palma namahayag nga andam na ang Sugbo alang sa umaabot nga NYD.

“Cebu will continue to host similar significant events. Together, we will do our best to make this event a celebration of faith, hope, and joy. Cebu is ready for the NYD and we welcome the delegates who will come here and we promise to do our best that this event would be fruitful, would be joyful, would be a reason (to glorify the Lord).” sumala sa arsobispo.

Ang NYD usa ka kalihokan nga pagahimuon sa matag duha o tulo ka tuig nga salmutan sa kabatan-unan gikan sa nagkalainlaing archdiocese sa nasod.