I let you go
Naunsa na ba ko ani, uy? Wa na gyud ko makasabot sa akong kaugalingon. Sa pag-ingon ko kang Dindo nga tugtan ko siya nga mopahilayo nako, kahilakon gyud ko. Gisakitan gyud ko sa akong gisulti. Gani, bisan giunsa kog pugong sa akong kaugalingon, mitulo gyud ang akong mga luha.
Gipahiran ko ni sa akong palad. Mikupot si Dindo sa akong kamot. Seryuso kaayo siya.
“I’m sorry, Mona, kon naingon ko ani ron. Di ko nimo mabasol kon na-insecure ko. I know nga love gyud kaayo nimo si Ronron. Ug wa pa gyud mo magkabuwag bisag nagpalayo siya nimo. Nawad-an kog pagsalig sa akong kaugalingon. Naingon ko ani tungod sa kadako sa pagmahal ko nimo.”
Nanglugmaw sab ang mga luha ni Dindo. Misamot kadako ang gibati kong kaluoy niya. Ako mismo ang nagpahid sa iyang mga luha sa akong tudlo. Gigabling ko niya. Gigakos ko niyag hugot.
Nabatyagan ko ang pinitik sa iyang kasingkasing.
“I love you so much, Mona.” Mibuwag ko sa paggakos ni Dindo nako. Gipahiyoman ko siya. Gipislit ko ang lamurok ug puti niyang aping. “Ikaw, ha, gipahilak gyud ko nimo.” Paraygon ang akong tingog. Misandig ko sa dughan ni Dindo.
“Parehas ta, Mona. Nakahilak sab ko. I can’t afford to lose you.”
Gikusig kog hinay ang kilid ni Dindo. Nakatig-ik siya ug unya, nagkinataw-anay mi. Niadtong gabhiona, duna na koy lig-ong desisyon nga nakab-ot.
Pagkasunod gabii, namisita si Ronron nako. Malipayon kaayo siya. Gidad-an pa ko niyag tsokolet.
Nakahibawo man siya nga paborito nako ning pagkaona. Human ko madawat ang tsokolet, gipatong ko kini sa ibabaw sa center table nga bildo. Nag-atbang mig lingkod si Ronron.
“Gibuwagan mo na si Dindo, Mona?”
Dugay kong gitan-aw si Ronron. Angay lang gyud siyang makahibawo sa tinuod kong gibati.
“I’m sorry, Ronron. Nasuta ko sa akong kaugalingon nga wa na koy gugma nimo. Si Dindo ang tinuod kong gimahal ninyong duha.”
Nakapanghupaw si Ronron. Mitindog siya ug iya kong gilamano. “Panghinauton ko ang inyong kalipay, Mona. Mobalik ko sa Davao. Adto na lang gyud ko mopadayog eskuwela.”
Sa pagpanglabay sa mga adlaw, nagmalipayon na si Dindo. Duna na siyay pagsalig sa iyang kaugalingon ug kanako. (KATAPUSAN)