Tabal midaog sa South Korea marathon
Midaog si Cebu Olympian Mary Joy Tabal sa women’s 21-kilometer event sa 23rd Jeju International Tourism Marathon Festival sa Gujwa Life Sports Park sa Jeju Island, South Korea kagahapon.
Ang 28 anyos nga garbo sa brgy. Guba, Cebu City mihuman sa lumba sulod sa usa ka oras, 18 ka mga minutos ug 44 ka mga segundos.
Alang kang Tabal, kini nga kalampusan nakadugang sa iyang kadasig alang sa iyang pagpangandam sa 2018 Asian Games nga ipahigayon karong Agusto 18 hangtod Septiyembre 2 sa Indonesia.
“I have gained more confidence in this race. Overall I’m happy with my performance even if I did not break my personal best,” matod ni Tabal sa interbyu sa Sun.Star Cebu, igsuong buhatan ning mantalaan.
Nagkanayon si Tabal nga ang sakaon nga parti sa rota mao ang nakahatag kaniya og kalisod.
“The race served as an evaluation for me. It’s a good warm-up for Asian Games. I have more or less three months to go before Asian. I know I have things to improve,” dugang ni Tabal.
Human niini, si Tabal molarga pagbalik sa Italy aron ipadayon ang iyang hugot nga pagbansaybansay sa Tuscany Camp.
Ang laing Cebuana nga si Ruffa Sorongon nahimutang sa ikaupat nga luna sa oras nga 1:30:06.
Si Prince Hoey Lee nahiluna sab sa ikaupat sa men’s 21K pinaagi sa oras nga 1:14:44 samtang ang laing taga Cebu nga si Rafael Pescos nipatong sab ikaupat nga dapit sa 42K men’s pinaagi sa oras nga 2:50:27.
Ang upat ka Sugbuanon nahilakip sa 11 ka runners gikan sa Pilipinas nga ningdagan sa lumba.