SULTAN NAPAKYAS
Malampusong nadepensahan ni International Boxing Federation (IBF) super flyweight champion Jerwin “Pretty Boy” Ancajas pinaagi sa unanimous decision nga kadaugan batok sa kababayang si ALA fighter Jonas Sultan sa ilang makasaysayong away kagahapon sa Save Mart Arena sa Fresno, California, USA.
Ang tulo ka judges mingpadaog kang Ancajas sa ilang scorecards, 119-109, 119-109, 117-111.
Sa sayo pa lang, gidut-an na ni Ancajas og sunodsunod ug pintok nga jabs si Sultan hinungdan nga naglisod ang naulahi sa pag-ataki.
Apan ang agresibong si Sultan wala moundang ug padayun gihapon kini sa pagsuway og buak sa dependsa sa kampiyon. Adunay mga higayon nga nakapasulod si Sultan sa iyang kinumo.
Apan ang gitas-on ug gidakon ni Ancajas ang nakahatag kaniya og dakong bintaha hinungdan nga nakahakot siya’g mas daghang mga puntos.
Mas taas og nakuha nga punching rate ang kampiyon kontra ni Sultan (40%-37%) diin mibuhi kini’g 773 ka mga sumbag diin 234 ang nakasulod samtang si Sultan nagpalupad lang og 555 ka mga sumbag, 147 ang milandig.
Ang away ni Ancajas ug Sultan mao pa lang ikaduhang higayon sa kasaysayan sa boksing nga duha ka Pinoyng mga boksidor ang nag-unay og away alang sa usa ka lehitimong world title.
Una kining nahitabo niadto pang 1925 diin nadepensaan ni Pencho Villa ang iyang trono isip world flyweight champion batok kang Clever Sencio.
Si Ancajas misaka sa 30-11, 20KOs nga rekord samtang si Sultan nahagbong sa 14-4, 9KOs nga baraha.
Sa co-featured bout, impresibong nadepensaan ni World Boxing Association (WBA) super flyweight Khalid Yafai ang iyang korona pinaagi sa 7th round TKO nga kadaugan batok kang David Cormona.
Si Yafai nakapuntos og upat ka knockdowns una nahunong ang away.
Nalantawan nga si Yafai maoy sunod nga makontra ni Ancajas sa usa ka unification bout.