GSW BUHI PA
Western Conference finals nakaabot sab og Game 7
Ningbangon gikan sa 17 puntos nga pagkalubong ang hosts Golden State Warriors aron makmakon ang Houston Rockets, 115-86, sa Game 6 nga maoy nakatabla sa Western Conference finals series ug nakapugos og deciding Game 7 kagahapon sa National Basketball Association (NBA).
Si Klay Thompson maoy labing kuyaw nga nakaduwa alang sa defending champions ug gipangulohan niya ang kadaugan pinaagi sa iyang 35 puntos, nidugang og 29 puntos si Stephen Curry samtang niamot og 23 puntos si Kevin Durant.
“I guess you could say I was born for it. Man, that felt good,” matod ni Thompson.
Ang Rockets, nga ningkombati nga wala ang ilang pambatong pointguard nga si Chris Paul, gipangulohan ni James Harden pinaagi sa iyang 32 puntos, nihatag og 19 puntos si Eric Gordon samtang nitampo og 14 puntos si Trevor Ariza.
Si Paul nagpaalim sa angol sa iyang paa nga iyang natagamtaman sa hinapos nga bahin sa kadaugan sa Rockets sa Game 5 sa series.
Ang Rockets nakapasulbong dayon sa ilang opensa sa pagsugod sa duwa ug nakarehistro kini og 39-22 nga labaw human sa 1st quarter.
Nagpabiling naglabaw ang Rockets, 61-51, sa halftime.
Lahi na ang dagan sa estorya sa tibuok 2nd half diin gidominar sa Warriors ang Rockets sa hinakutay og puntos, 55-20.
“We just didn’t want to go out like that,” dugang ni Thompson, “we wanted to force Game 7 so badly.”
Pagsugod sa 3rd quarter, nagpaulbo’g 11-0 nga rally ang Warriors aron ilugon og balik ang labaw, 62-61, nga katapusan nilang natilawan sa sinugdanan pa lang sa kombati, 4-0.
Ning maong pagsutoy sa opensa sa Warriors gipabuto ni Thompson ang duha sa iyang siyam ka three-point bombs samtang gipasulod ni Curry ang usa sa iyang lima ka threepoint shot.
Padayong nanginit si Thompson hangtod nainat niya ang labaw sa Warriors sa 89-77 pinaagi sa lain niyang three-point shot sa nahabiling 9:40 minutos.
Human niini, wala na nakabangon pagbalik ang Rockets hangtod na sa katapusang gutlo.
Sa grabeng gipakita ni Thompson, gihulagway siya ni Warriors coach Steve Kerr nga daw usa ka makina.
“I thought Klay was amazing tonight, not just the 35 points and the nine 3s but his defense,” matod ni Kerr. “The guy’s a machine. He’s just so fit physically. He seems to thrive in these situations.”
Hinuon taliwala sa dakong kapildihan, ang Rockets masaligon gihapon sa ilang poruhan nga molampos sa series hilabi na kay mobalik sa ilahang balwarte ang deciding Game 7.
“Nothing changes for us. We know what we have to do,” asoy ni Harden. “... We’re still confident. We’re a confident group. We’ve just got one chance.”
Nagkanayon si Rockets coach Mike D’Antoni nga wala pa’y kaseguroan kon makaduwa na bag balik si Paul sa deciding Game 7 nga ipahigayon ugma.
“He’s devastated. He has to be. We’re all devastated for him. At the same time, we’ll rally and do what’s right,” matod ni D’Antoni kabahin kang Paul.
“He’s so integral in what we do and the spirit of the team. And him being here is a big deal, and him being on the bench is a big deal.”/