BOPK MIHAROS
SANGGUNIANG KABATAAN FEDERATION
■MANANAUG. Taliwala sa kainit sa piniliay sa Sangguniang Kabataan Federation (SKF) sa dakbayan sa Sugbo nga gipahigayon sa Parklane International Hotel kagahapon sa buntag, ang nidaug nga presidente mao ang kaalyado sa Bando Osmeña Pundok Kauswagan (BOPK) nga si Jessica Resch (tuo), SK chairperson sa Barangay San Nicolas Proper, ug bise presidente mao si Joseph Gepte (wala) sa Brangay T. Padilla. Usa sa makita sa luyo mao si Mayor Tomas Osmena nga nitambong sa usa ka non-partisan nga ehersisyon sa mga batan-on, diin gibansay nga mga lider ug mosunod sa saktong lagda sa balaud sa pulitika isip paglaum ug mga umaabot lider sa nasod.
Giharos sa Bando OsmeñaPundok Kauswagan (BOPK) ang tanang posisyon sa Sangguniang Kabataan Federation (SKF) human sa eleksiyon nga gipahigayon sa Cebu Parklane International Hotel, dakbayan sa Sugbo kagahapon sa buntag.
Si Jessica Resch, 21, graduate sa kursong Industrial Engineering, maoy nahimong presidente sa pederasyon nga nakakuha kini og 44 ka boto nga giatbangan ni Sonia Cal.
Mapasigarbuhon nga niangkon si Resch nga kaalyado siya BOPK.
“I am a pure BOPK,” matod ni Resch.
Aktibo si Resch sa pagserbisyo sa kaubanang kabatan-onan ug dunay kaugalingong charity works kaniadto.
Sigon ni Resch nga mao kini ang nakapaduso niya nga modagan sa pagka-chairman.
“At first kay diba close kaayo ko sa kids kanang sa Taboan pirmi gyod ko sige'g feeding dira kay daghan kayg less fortunate people nya ako ganahan ko sa mga youth sa amoa sa barangay nga naa mi kaugmaon nga ako, siguro ako gud ang taytayan sa kaugmaon sa among kabatan-onan,” saysay sa dalagita.
Wala pay gisaad nga mga plano si Resch apan aduna na siyay nalantaw nga tigumon ang tanang chairpersons sa tanang barangay sa siyudad aron pagplano sa lihok nga ipakatap para sa kabatan-onan.
Midasig si Resch og kahiusahan sa tanang SK, “Mao na ako, ihiusa silang tanan kay ganahan kong komportable ko sa tanan chairman nga makig-istorya nila, makig-trabaho nila. Wala koy boundary nga gipangita nga para lang magkagubot, wala ko ana. I want unity para sa tanan SK chairman.”
Lakip sa mga nakadaog sa pederasyon mao silang Joseph Gepte isip Bise Presidente, Dexter Auxtero isip Secretary, Anthon Miñoza isip Treasurer, Trisha De Castro isip Auditor, Sharmaine Maloloy-on isip PRO, Jhansien Malapit ug Sam Go isip Sergeant at Arms.
Nasayran sa Superbalita Cebu gikan sa Commission on Election (Comelec) nga non-partisan apan nadayag ang pagtumaw sa partido ug walay lipudlipod nga pag-angkon sa mga kandidato sa SK. /