70 ka pribadong tunghaan sa CV mipasaka og tuition

Moabot sa 70 ka mga pampribado nga tunghaan sa Central Visayas (CV) nga anaa sa elementarya ug sekondarya ang mopasaka og tuition fee karong pagbukas na usab sa klase alang sa school year 2018-2019.

Samtang, kasagaran sa mga tunghaan nga nipasaka sa ilang tuition fee anaa kini mahimutang sa dakbayan sa Sugbo diin moabot sa 26 kini ka mga pampribado nga tunghaan.

Matod ni Department of Education (DepEd) 7 OIC Assistant Regional Director Sal Jimenez nga aduna’y 151 ka mga tunghaan ang ni-apply.

Apan ang 81, wala kini mipasaka sa ilang tuition ug nipahibawo lang nga pareho lang ang ilang tuition sa niagi nga school year.

Sa 70 ka tunghaan, niabot sa 10 ka tunghaan ang nipasaka og tuition fee increase sa dakbayan sa Taliysa, tag walo usab sa dakbayan sa LapuLapu ug sa Tagbilaran City.

Dugang ni Jimenez nga subay niining pagpasaka sa tuition fee sa pipila ka mga private schools andam sila nga mo-accomodate sa mga tinunan kon ugali nga mobalhin kini sa public school.

Nasayran nga sa mga tuition fee increase nga gisang-at 70% sa gipangayo niini alang sa pagpasaka sa suholan sa mga magtutudlo.

Samtang,ang laing 30% alang kini sa pasilidad ug uban pa.

Wala hinuon gidetalye sa DepEd 7 kon elementarya o sekondarya ang pagpasaka sa tuition nga gipangayo sa mga tunghaan.

Aduna’y 935 ka mga pampribado nga tunghaan ang Central Visayas nga nagtanyag og elementarya og sekondarya.