TALISAY MAOY I-SENTRO SA TRAFFIC ACADEMY

Kon mosugot ang siyudad sa Talisay, hayan nga mao na unya kini ang mamahimong sentro sa Traffic Academy nga itukod sa Sugbo.

Ang Metro Cebu Development and Coordination Board (MCDCB) nipasar og resolusyon alang sa pagtukod sa Traffic Academy ug napilian ang Talisay nga maoy butangan niini, ilabi na kay duna silay existing nga training center. Matod sa focal person on traffic management sa Kapitolyo nga si Joy Tumulak, dugangan na lang unya sa MCDCB ang kasamtangang curriculum nga gitudlo sa training center sa Talisay aron mas mamahimo kining responsive sa gikinahanglan nga pagbansay-bansay sa mas daghang traffic enforcer.

Dugang ni Tumulak nga sa higayon nga hingpit nang ma-establisar ang academy, hayan nga kinahanglang makaagi una sa training dinhi ang mga indibidwal nga buot mosulod pagka-traffic enforcer sa nagkadaiyang lungsod ug siyudad dinhi sa Sugbo.

“So mohangyo mi sa mga mayor nga ilang hatagan ug gibug-aton ang academy. I-professionalize nato ang mga

traffic enforcer,” niingon si Tumulak.

Gawas sa Talisay, lakip ang siyudad sa Mandaue sa mga gikonsiderar nga maoy butangan sa traffic academy apan mas gipili ang Talisay tungod kay nag-representar kini sa mga dapit sa unang distrito nga gihulagway ni Tumulak, nga maoy sagad magka-problema sa trapiko.

Gipadayag sab ni Tumulak nga mas daghan ang volume sa mga sakyanan nga moagi sa Talisay paingon sa habagatang Sugbo kon itandi sa Man- daue City ug sa mga dapit sa northern Cebu.

Sa pagka-karon, himuong prayoridad sa Traffic Academy ang mga traffic enforcer sa mga dapit sa southern Cebu nga maoy unang makapahimulos sa training.

Dili hinuon kini libre. Kinahanglang mobayad ug minimal pay ang lokal nga kagamhanan alang sa ilang mga enforcer nga ipabansay labot

sa traffic management ug traffic direction and control.

Dugang ni Tumulak, molungtad ug lima ka adlaw ang pagahimuon unya nga training.

Sa pagka-karon, magpaabot pa hinuon si Tumulak sa desisyon sa Talisay City kon mosugot ba kini nga anha sa ilang siyudad i-establisar ang Traffic Academy.