MOA alang sa mental health awareness gipirmahan ni Davide
Lakip na unya ang mental health ang hatagan og pagtagad sa mga medical health practitioners dinhi sa Sugbo.
Kini human nagpinirmahay og kasabutan alang niini ang mga local governmnet unit (LGU) sa habagatang Sugbo, ang Kapitolyo, ug mismo ang Philippine Mental Health Association.
Usa ang siyudad sa Naga sa mga nipirma sa memorandum of agreement alang sa pagpalapad sa mental health awareness dinhi sa Sugbo.
Nipirma usab sa kasabutan si Gobernador Hilario Davide III isip representante sa provincial government, uban pang mga mayor sa habagatang Sugbo, mga tinugyanan sa Provincial Health Office ug sa sa Phil. Mental Health Association (PMHA).
Matod ni Mayor Christine Chiong, dakong tabang ang kaaktibo sa mga mental health professional aron pagtubag sa mga isyu sama sa depresyon, anxiety, personsality disorder ug uban pa.
Tinguha ni Chiong nga mabansay sa mga taga-PMHA ang mga magtutudlo , ilabi na ang mga guidance counsellor sa nagkadaiyang tunghaan sa ilang siyudad alang sa mas komprehensibong pagtubag kon dunay mga tinun-an nga maapektohan sa nagkadaiyang mental health problems.
Duna nay giandam nga dapit ang siyudad, diin unya ipahigayon ang mga sesyon alang sa mga mental health counselling o kaha training sa mga tawo nga makatabang pag-address sa maong suliran diha sa mga eskwelahan, kabarangayan ug mismo sa komunidad. /