You’re always in my heart

Gikuhit ko ang bukton ni Ronnie. Milingi siya nako. Seryuso gihapon siya. Madasigon nga pagka tawo ang akong boyfriend. Naunsa man ni siya ron? Gingislitan ko si Ronnie. “Don’t tell me nga nagselos ka kang Remuel, Ron?”

Gusto kong mahibaw-an kon tinuod ba ang akong pagtuo. Di man seluso kini si Ronnie. Apan di man gyud tingali kalikayan nga mangabubho siya kang Remuel. Nagkasuod gyud mi pag-ayo si Remuel kay silingan ra man mi.

Daan ko na siyang kaila ug ikaduwa-duwa kaniadto sa mga bata pa mi. Pagedad niyag 10, didto na siya mopuyo sa Canada uban sa iyang mga ginikanan. Dugay nang nagtrabaho ang mga ginikanan ni Remuel sa Canada ug si Remuel gibilin lang una sa iyang Lolo ug Lola nga ang balay duol ra sa among balay.

Nawala na sa akong hunahuna si Remuel dihang didto na siya sa Canada. Apan karong bag-o nga mibakasyon siya sa Cebu ug sa iyang Lolo ug Lola siya nagsaka, nagkasuod mig balik. Buhi pa gihapon ang iyang mga apohan apan mga tiguwang na gyud. Di parehas kaniadto sa pagbiya ni Remuel sa Cebu nga medyo batan-on ug himsog pa ang iyang Lolo ug Lola.

“Selos? No way. Di na nako kinaiya, uy, Sharon.”

Mikatawa si Ronnie. Apan nasabtan nako nga namakak siya. Klaro nga pinugos lang ang iyang pagkatawa.

“Really?” Mikatawa sab ko. “Wa ka man say angay selosan, di ba, Ron?” “Bitaw.”

Human makatubag ang akong boyfriend, wa na siya magtingog. Mibalik na sab ang iyang pagka seryuso. Wa na lang sab ko magtingog. Naunsa man sab ko, uy? Sa dinhi pa si Remuel, mas dakong panahon ang gihatag ko niya kay kang Ronnie. Kami ang kanunay magkuyog si Remuel sa pagpanuroy sa siyudad, sa pagpangaon sa gawas. Morag nakalimtan ko si Ronnie.

Mao tingali kini ang hinungdan nga nagselos siya kang Remuel apan wa siya motug-an nako. Makakunhod man sa pagka lalaki sa usa ka tawo kon magpakita siyag pagpangabubho. Gilikayan gyud ni sa mga lalaki kay mogawas man nga wa siyay pagsalig sa iyang kaugalingon.

Apan nagdako gyud ang akong pagtuo nga nangabubho si Ronnie kang Remuel.

(SUMPAYAN)