TEAM uyon sa hiniusang traffic academy lukop sa Metro Cebu
Gitataw sa pangulo sa Traffic Enforcement Agency of Mandaue (TEAM) nga dako’g tabang unya ang pagbutang og hiniusang traffic academy alang sa mga enforcer sa Metro Cebu.
Sa dihang nahinabi sa Superbalita Cebu kagahapon, si Antigua niingon nga “mas makaayo” sa istriktong pagpatuman sa balaod trapiko ang maong tinguha.
“Maka-ayo gyud siya kay ma-uniform naman ang enforcement,” matod ni Antigua ning mantalaan.
Dugang niya ang usa nalang pud ang format nga sundon sa mga local government unit sa pagpatuman sa balaod trapiko sa tagsatagsa ka mga dapit.
Sumala ni Antigua nga dugay na ang plano sa pagtukod og Traffic Academy nga tuyong mobansay sa mga enforcers sa nagkadaiyang dakbayan ug lungsod sa Metro Cebu.
Tuyo niini nga mas mapalawman sa mga enforcer ilang mga kalam ug kahibalo sa pagpatuman sa trapik pinaagi sa pagpa-ubos ug kurso aron sila makakuha og sertipikasyon nga haum sila nga mopatuman o mobantay sa trapik.
Sigun ni Antigua nga possibleng ang Technical Education and Skills Development Authority (TESDA) unya ang mohimo og pagbansay sa en forcers.
“Ang nakanindot sa traffic academy kay kung naa nay certification ang mga enforcers nga nakahuman ug nakapasar sila sa training, mahimo silang kuhaon as regular or casual employee sa tagsa-tagsa ka mga local government unit,” ni Antigua.
Sa laing bahin, kasamtangang nagpaabot ang TEAM sa Department of Public Works and Highways (DPWH).