P750 suhulan posible apan RTWPB wagtangon una

Mamahimong posible ang giduso karon sa kamara nga himuong P750 ang minimum nga suholan sa nasod kana kon i-abolish ang kasamtangan nga tagsa-tagsa ka mga Regional Tripartite Wages and Productivity Board (RTWPB) sa matag rehiyon.

Kini matod ni Department of Labor and Employment (DOLE) 7 regional director Atty. Alvin Villamor.

Samtang, posible nga sa Hunyo na mahibaw-an pila ang bag-ong minimum nga suholan sa rehiyon subay niadtong mga gipangsang-at nga petisyon sa duha ka mga labor group.

Matod ni Villamor nga gitukod ang RTWPB pinaagi sa Republic Act 6727 o ang Wage Rationalization Act, diin mao kini ang gimandoan nga mohimo og desisyon sa kon pila ang makiangayon nga minimum wage sa matag rehiyon.

Pasabot niini nga kon wagtangon ang maong ahensiya nga ubos sa DOLE, aduna’y posibilidad nga mapatuman kini.

Hinuon, matod ni Villamor nga makiangayon lang usab ang pag-usbaw sa suholan tungod kay nimahal ang palaliton subay na usab sa bag-ong TRAIN Law.

Samtang human sa nagkadaiyang public hearing sa duha ka wage petition sa Cebu Labor Coalition nga dugang P155.50 across the board, ug P120 nga dugang nga gipangayo sa Associated Labor Union - Trade Union Congress of the Philippines, anaa na sa deliberasyon karon ang RTWPB 7 sa usbaw sa suholan sa Central Visayas.

Matod ni Villamor nga posible karong Hunyo aduna na sila’y desisyon kon pila ang i-usbaw sa suholan sa Central Visayas.

Nagkainit ang panawagan sa umento sa suweldo, lakip sa pletihan sa sakyanan, tungod sa kanunay nga pag-umento sa presyo sa mga produkto sa petrolyo matag semana ug walay rollback sa presyo.