BAEX building sa Capitol compound gub-on, bag-ong building tukuron

Ang Office of the Building Official (OBO) sa siyudad sa Sugbo nihatag na’g pagtugot sa Kapitolyo nga idemolis o gub-on ang karaang BAEX building sulod sa Capitol compound.

Ang pagpaguba ipahimo sa modaog nga bidder alang sa pagtukod sa bag-ong edipisyo nga ipuli niini.

Samtang ang “scrap” gikan sa gub-on nga building, gipaniguro sa Kapitolyo nga matarong sa pag-dispsose ug provincial government maoy makapahimulos niini.

Matod ni Provincial General Services Officer Jone Sepe paabuton pa nga mahuman ang bidding ug duna nay kontraktor alang pagtukod sa bagong edipisyo nga ipuli niini, kay sila man maoy tahasan sa pag-guba sa karaang building.

Gawas sa P1.5 billion nga pundong hulman sa bangko alang sa pagpatukod sa 20 ka andanang bag-ong edipisyo, naglain na og P500 mil ang provincial government agig bayad sa pagpaguba niini.

Subay sa demolisyon sa karaang edipisyo, gipaniguro sa PGSO nga matarong sa pag-dispose ang “scrap” nga makolekta, sama sa mga kabilya ug sin, ug nga ang provincial government maoy makapahimulos sa kita gikan niini. I-dispose kini pinaagi sa pagsubasta.

Human napirmahan ang load agreement alang sa paghulam sa Kapitolyo ug pondo sa Development Bank of the Philippines alang sa proyekto, gilihok na karon ang pag-secure ug borrowing capacity certificate gikan sa Bureau of Local Government Finance ug pagkuha ug Monetary Board Opinion gikan sa Bangko Sentral ng Pilipinas.

Dungan niini, gipadayag ni Provincial Budget Officer Danilo Rodas, nga lihukon sa Kapitolyo ang supplemental budget alang sa pag-gahin ug pondo sa proyekto. Hangtud nga dili kini ma-comply, dili pa makapahigayon sa bidding.

Sigun sa Provincial Budget Office, molungtad ug 10 ka tuig ang pagbayad sa Kapitolyo sa loan niini nga P1.5 billion sa DBP.

Sa unang tulo ka tuig, bayran niini ang interes nga 2.9% o P1 million matag tuig. Samtang sa ikaupat hangtud sa ika-10 nga tuig, bayran na ang amortization nga P200 million matag tuig.