Ang kakuwang og classrooms sa CV

Pastilan, hangtod karon wa pa diay mahuman ang Department of Public Works and Highways (DPWH) sa Rehiyon 7 sa pagtukod og mga classrooms o lawak-saringan nga gigahinan na og budget niadtong tuig 2014 pa. Kini maoy hinungdan nga ang Department of Education (DepEd) 7 nanawagan sa maong ahensiya uban sa panghinaot nga dali-on na sa pagtiwas og tukod ang maong mga classrooms.

Sa 13,057 ka mga classrooms nga gigahinan og budget moabot pa ngadto sa 2,766 niini ang wa matukod.

Si Salutiano Jimenez, ang assistant director sa DepEd 7, mibutyag nga ang ubang mga kontraktor wa na motiwas sa ilang pagpanukod og edepisyo niini tungod sa kalayo sa eskuwelahan, samtang ang uban gipangbiyaan tungod sa kaapiki sa kuwarta.

Base usab sa dokumento, adunay 66 ka mga classrooms nga naapil na sa 2.7 billion nga allocation sa 2014 hangtod karon wa pa mahuman og tukod.

Ang 49 niini didto sa Negros Oriental, 15 sa Lapu-Lapu City ug duha sa Guihulngan.

Sa tuig 2015, sa 4,614 ka mga classrooms, 374 niini ang wa makompleto. Ang 118 niini sa Negros Oriental, 61 sa Lapu-Lapu City, 46 sa Cebu City, 29 sa Danao City, 16 sa Guihulngan, 13 sa Tanjay, 12 sa Cebu Province ug upat sa Bayawan City.

Sa 2016, moabot ngadto sa 1,604 ang wa matiwas, 438 niini sa Cebu Province samtang sa miaging tuig, laing 718 ang sa gihapon wa mahuman.

Mabasol man tuod ang DPWH niini, pero makapangutana usab kita kon nganong sa matag ting-abli ra man sab mopadayag sa ilang reklamo ang DepEd?

Labaw pang makalibog kining pamahayag ug pasalig ni Jimenez nga duna diay igong classrooms ang Region 7 karong tuiga nga magamit. Unsa man gyuy tinuod, Sir?