Wa mauyoni

Dear Noy Kulas,

Tagoa lang ko sa ngan nga Dave, 30 anyos. Nagtrabaho na ko diri sa Cebu. Pareho mi sa akong uyab nga duna nay mga trabaho nga maayo.

Ang akong problema mahitungod sa akong family nga wala maka-gusto sa akong uyab. Kami sa akong uyab, nag-plano na nga magpakasal karong tuiga pero nahadlok ming duha unsaon namo sa pagpananghid sa akong family kay basin di sila mosugot.

Nakaila na sila sa akong uyab pero maorag wa sila makauyon bisan kon maayo ang akong girlfriend nila. Wa silay maayong tinagdan sa akong uyab. Naa na ko sa sakto kaayong edad sa pagminyo. Ganahan na ko magminyo karong panahuna, apan maorag di sila ganahan nga magminyo ko. Unsay akong buhaton?

Salamat.

DAVE

Dave,

Niingon na man ka nga naa ka na sa hustong edad, busa ayaw kahadlok. Kon nabalaka ka nga di nila suportahan bisan wa silay igong katarungan, pangandam mong duha sa imong uyab alang sa inyong kasal nga kamo ra.

Sa di pa nimo ni buhaton, ayaw kahadlok sa pagpangutana sa imong parents ug pamilya kon husto ba ang imong pagtuo nga di sila ganahan sa imong uyab. Basin imo ra sab ning perception kay duna man say parents nga di lang gyud kaayo tig-estorya sa uyab sa ilang anak. Duna say mga inahan nga mangigi sa ilang anak. Natural ra ni nga pagbati sa parents.

Kon di ka matagbaw sa ilang pagpasabot, ikaw na ang mo-decide kon mo go against ka sa ilaha. Anyway, naa ka na sa hustong edad ug kaya ra tingali ninyong duha nga mangandam sa inyong kasal. Tigomi ninyong duha ang mao nga event kutob sa inyong makaya. Di necessary nga dako ang inyong gastuhon kay di ni maoy kaseguraduhan nga magmalampuson ang inyong kaminyuon.

Basta timan-i kanunay nga sa mga ingon niani nga sitwasyon, ang imong kaugalingon nga hukom ang mopatigbabaw basta lang balido ang mga punto. Kay in the end, kamo man sa babaye ang magpuyo, di man sila.

NOY KULAS