You’re always in my heart
Gihatod ko ni Ronie sa among balay. Gipasulod ko siya apan mibalibad siya. Wa gani siya mokanaog sa iyang awto.
“Amping, Ron.”
Igo lang mitando ang akong boyfriend ug gipadagan na niya ang sakyanan. Nangagho na lang ko. Samtang didto ko sa sulod sa akong kuwarto, nag-ilis og para sa balay, nahunahuna ko kon duna bay igong hinungdan si Ronnie nga magselos kang Remuel. Unya nakapanghupaw ko. Duna siyay rason. Tingali, sa iyang pagtuo wa gyud koy love niya. Unsaon man gud, kadaghan ko balibari si Ronnie kon makigpanuroy siya nako, ug sa pagpangaon sa gawas, kay si Remuel man ang akong gipalabi. Nahunahuna man gud nako nga mubo ra ang panahon ang pagpuyo ni Remuel sa Cebu. Gusto man gyud ni Remuel nga mosuroy siya sa mga nindot nga lugar sa Cebu, sa mga nindot nga beach resorts.
Ug kay wa man siya masuheto sa maong mga lugar, maong ubanan ko siya.
Gilain gyud tingali kini pagsabot ni Ronnie. Apan naghunahuna ko karon. Gihinuktokan ko pag-ayo ang maong kahimtang. Nganong mas suod ko man si Remuel kay kang Ronnie? Si Ronnie man unta ang akong boyfriend? Ah, tungod tingali kay sa mga bata pa mi si Remuel, kami ra man kanunay ang magduwa-duwa. Kami sab kanunay ang magkuyog ug magsawo sa pagkaon sa pipila ka tuig nga nag-eskuwela si Remuel sa elementarya sa among lugar.
Apan mao gyud kaha kini ang tinuod nga hinungdan? Nganong nakahilak man ko didto sa airport dihang milarga na si Remuel balik sa Canada?
Mihigda ko sa kama. Naglibog na nuon ko sa akong kaugalingon, sa pinitik sa akong kasingkasing. Duna bay nagpaluyong pagbati aning talagsaon kong pagpakigsuod kang Remuel nga parehas na ming ulitawo ug dalaga?
Migawas ko sa akong kuwarto. Midiretso ko sa among terrace. Two storey ang among balay. Bugnaw ang hangin sa akong nahimutangan bisag udto na. Nuon, init sa gawas kay summer pa man. Gikuha ko ang selpon sa bulsa sa gisul-ob kong short pants.
Gitawgan ko si Ronnie. Mikunot ang akong agtang kay nagsigeg kiring ang selpon sa akong boyfriend apan wa gyud niya tubaga. Nahiubos gyud kaha si Ronnie nako? Hilom kong nakaingon.
(SUMPAYAN)