Pagano si Padre Ambrose
Bag-o pang nadestino si Padre Ambrose sa lungsod sa Sta. Monica, gibatikos na ni Sister Maria Kondeno, ang pamuno sa Catholic Women’s League (CWL) sa dapit. Nakasala kuno ang pari sa iyang pagpasud sa simbahan ug pagmisa sa patayng lawas sa naghikog human nanigbas og mga tawo sa buwangan sa lungsod.
Ang laing atake sa beyata nga tabian nga si Padre Ambrose kuno way katungod sa paghatag sa tanang kolekta sa ikaduhang misa sa usa ka nasunogan nga pamilya sa lungsod.
“Di na angay ihatag ang kolekta sa laing tawo, uy!” Sing- al ni Sister Maria, kay alang da kuno ni sa simbahan. “Masilutan na siya kon mahibawo ang arsobispo.”
Usa ka buntag miripike ang kampana sa simbahan pagpahibawo nga nahuman na ang kasal. Nahingangha ang mga tawo kay ang lalake sa gikasal usa ka muslim nga nangasawa kang Imelda, ang beauty queen sa Sta. Monica.
“Tan-awa ninyo, gikasal sa atong simbahan ang moros nga di binunyagan sa atong simbahan, pagano na siyang paria!” Nagbuwa sa kasuko ang baba sa beyata. “Modawat na diay tag moros nga nagsupak sa atong pagtuo!”
Ang grabeng kasuko ni Sister Maria nahitabo dihang na- himong usa sa mga judge sa beauty contest sa lungsod ang pari. Nakakita gyud kuno siya sa mga babaye nga nag-swimsuit nga naghiyudhiyod atubangan sa pari.
“Kamaayong labayog bato sa pari, morag nalibat ang tinan-awan sa paa sa mga kandidata. Hesus! Hesus! iyaha ra to!”
Dihay gisuroy nga petisyon batok sa pari. Si Conrad nga usa ka kulomnista sa labing halinon nga mantalaan, wa mopirma kay maminaw pa siya sa habig ni Padre Ambrose. Sa iyang pakigkita sa pari, kini misaysay sa mga katarungan panalipod sa mga pagsaway kaniya. Sa wa pa kasla niya ang muslim nakapakita kinig baptismal certificate nga siya gibunyagan sa simbahang katuliko sa Mindanao. Kon ang naghikog nakasala nganong di man nato pasayluon ug luwason? Di diay nato tabangan ang nasunogan? Kita ra gyuy magpasulabi?!
Sa iyang paglakaw mitagingting pa ang katapusang gisulti sa pari. “Kay pari ta, di diay ta kaapil sa mga kalihukang katilingbanon sa lungsod? Usa unta ni sa dapit nga hugtan sa pag-apil sa simbahan aron malig-on pagsamot ang pagtuo sa katawhan sa Diyos.”
Imbes mopirma siya sa petisyon nga nagdaot kang Padre Ambrose, gipanalipdan hinuon niya ang pari sa iyang lindog. Nahibaw-an ni Conrad nga gipatawag ang pari sa palasyo. Paglabay sa pipila ka mga buwan nadungog nga gi-promote sa pagka obispo si Padre Ambrose didto sa Leyte. Nagpahiyom si Conrad sa hilom kay milampos siya paglaban kang Padre Ambrose. (KATAPUSAN)