Warriors inilog pero Cavaliers andam niini
Nihaom gyud ang atong pangagpas nga kon moabot og 100 o kapin ang puntos sa Golden State Warriors, way pagduda mahibalik gyud sila sa NBA Finals, apan kon dili, hayag ang posibilidad nga ang Houston Rockets maoy makakuha sa katungod nga makigsangka sa Cleveland Cavaliers sa championship series.
Diha na untay migimaw nga kahigayonan sa Rockets human kini midominar sa unang duha ka quarters apan ang ilang hugot nga depensa ug ang pagkapupos sa ilang pasensiya sa ilang opensa nilubad man sa ikatulo ug ikaupat nga quarter, sa kalit lang, nahanaw ang tanan.
Bisan gani si Harden, ang lig-ong kandidato sa pagka-most valuable players, daw sa nawad-an sa iyang focus sa duwa kay gawas nga nagsigi og kasipyat, gihasol usab siya og mga crucial turnovers.
Mahimong ang pagkawagtang ni Chris Paul, ang beteranong pointguard sa Rockets nga wa makaduwa sa Games 6 ug 7 tungod sa injury sa iyang paa, nakatampo og dako sa ilang kapildihan, pero labaw sa tanan ang pagkagusbat gyud sa ilang opensa nga mora og nagbinagsa na lang sila sa pag-ataki maoy nagtigbak sa ilang paglaom.
Karon, nga sa ikaupat nga sunodsunod nga higayon, mag-abot na usab ang Golden State Warriors ug ang Cleveland Cavaliers, daghan man tuod ang miangkon nga gibidli na sa maong panagengkuwentro, apan mas midaghan ang miinit nga mga dumadapig sa matag habig.
Sa akong hilom nga pagusisa sa bisan asa nga eskinaha, duna man tuoy daghang mga dumadapig ang Cavaliers apan mosibaw gyud ang gidaghanon sa mga mosuporta sa Warriors.
Hinuon, dili tanang supporter sa matag team mga loyalista, kon dili sagad nila mipabor lang tungod sa pustada.
Sa tapad, way LeBron James ang Golden State pero duna silay tulo ngadto sa lima ka mga hait nga piyesa, - Kevin Durant, Stephen Curry, Klay Thompson, Draymond Green, Shaun Livingstone/Andre Iguodala - usa ka dakong rason nganong lisod sila pildihon.
Mao nga misamot sila og ka inilog ning maong series nga sugdan ugmang adlawa.
Warriors in 6, pero og kon moabot og Game 7, Cavs will win it.