P3.2 M GAHIN SA KAPITOLYO SA RADIO AD

Kapitolyo nigahin og P3.2 milyones alang sa pagkuha sa serbisyo sa advertising agency nga mohimo sa mga radio advertisement pagpahibalo sa mga programa ug proyekto sa provincial government. Sigun sa Provincial Information Office, mandato sa ilang buhatan ang pagpahibalo sa mga gihimo sa kagamhanan ug dili pagpangandam sa piniliay o sa posibleng kandidatura ni Gob. Hilario Davide III sa piniliay sunod tuig ang ilang gihimo.

Gipublikar sa Bids and Awards Committee diha sa website sa Cebu Provincial Government ang pagpangita nila sa mga interesadong

advertising agency nga maoy mohimo sa radio advertisement sa Kapitolyo, ilabi na labot sa mga programa ug proyekto niini.

Matod ni BAC Chairman ug PIO officer-in-charge Mark Tolentino, lakip unya sa tahas sa

winning bidder o ad agency ang pag-atiman sa placement sa mahimo nilang mga advertisement diha sa mga broadcasting

company o radio stations.

Pinaagi niini, gitumbok ni Tolentino nga mas daghan na ang makadungog o makahibalo sa mga gipanghimo sa Kapitolyo, pinaagi usab sa mas kredible ug mas daghang naminaw nga mga estasyon sa radyo.

Matod ni Tolentino, dugay rang nagahinan og pundo sa PIO ang pagbutang ug propaganda diha sa nagkadiayang estasyon sa radyo ug walay kalabutan niini ang ang eleksiyon sa sunod tuig.

Gipasabot niya nga mandato ug kabahin sa tahas sa PIO ang pagpahibalo sa mga nahimo sa provincial government ug dili kini alang sa pag-abante sa posibleng kandidatura ni Davide III ug sa uban pang opisyal sa probinsiya sa piniliay.

Giangkon hinuon ni Tolentino nga dili malikayan ang maong pagduda sa publiko kay mosalmot man sa eleksiyon o politika ang mga lider nga namunuan sa lokal nga kagamhanan busa kinahanglan nga magbantay sa matag lihok.