Habalhabal drivers isip tigpaniid
Mga drayber sa habalhabal sa dakbayan sa Lapu-Lapu gibansay sa kapulisan sa dakbayan pinanguluhan sa City Intelligence Branch (CIB) sa nagkadaiyang hisgutanan mahitungod sa trapik kagahapon sa buntag.
Moabot ngadto sa 46 ka mga lider sa mga grupo sa mga habalhabal drayber sa dakbayan ang nitambong sa maong pagbansay pasado alas 9 sa buntag.
“The activity aims to empower the different stakeholders of Lapu-Lapu City Police Office on its efforts to curb criminalities in the area of responsibility and deter any terroristic plan(s),” matod ni PSupt. Mark Gifter Sucalit, pangulo sa City Intelligence Branch sa text sa Superbalita Cebu.
Ang CIB- LLCPO maoy nangunay ug nipasi-ugda sa maong kalihukan nga gihimo sa training room sa headquarters sa may City Hall site, Brgy. Pusok, sa dakbayan.
Sa training, gipakita ni Sucalit ang ilang mga monitoring sukad niadtong Kadaugan sa Mactan labot sa seguridad.
Gitudluan sab ang mga lider sa mga balaod-trapiko lakip na ang mga ordinansa sa dakbayan kalabot sa trapik.
Sa kalihukan, giawhag sab ni Sucalit ang mga habal habal drayber sa pagtabang sa kapulisan pinaagi sa pagkooperar, koordinar ug pagtaho sa mga kadudahang tawo o grupo nga masigpatan sa Lapu-Lapu. Niuyon niini ang mga lider ug nipadayag sa ilang pagsuporta sa kapulisan alang sa pagsugpo sa kriminalidad ilabi na sa hulga sa terorismo.
Kahinumdoman nga sunodsunod na ang mga pusil-patay sa Lapu-Lapu nga naglambigit sa mga riding-in-tandem nga mga suspetsado.