1,279 naatiman sa RCMC Health Check
Naatiman ang 1,279 ka mga lumolupyo palibot ug mga manimbahay diha sa Basilica del Santo Niño ning dakbayan ug nakabaton sa medikal nga pagtagad atol sa unang Grand Health Check sa Rotary Club of Metro Cebu (RCMC) sa miaging Mayo 19.
.Usa ka “Halad ni Sto. Niño Para Ninyo,” naatiman sa kalihukan ang mga pasyenteng hamtung ug mga kabataan nga may nagkalainlaing gipamati, ug kadto sang buot masayod sa kahimtang sa ilang panglawas, matod ni Rtn. Mary Ann Soria nga maoy nangulo.
Mitanyag ang mga miboluntaryo og mga diagnostic services, sama sa pap smear ug breast examination, pagsuta sa blood sugar, panan-aw ug pagdugong, scoliosis screening, digital rectal exam, ug mental health check, tanan didto sa nataran sa Basilica, siya mibutyag.
Uban sa pakig-alayon sa Order of St. Augustine (OSA) Cares pinaagi sa Santo Niño Solidarity Appeal Project niini, gipahigayon sab ang mga ginagmayng pag-opera sa cyst (hubag), pagpanuli ug pagibot sa mga dautang ngipon, nagkanayon si Soria.
Natanyag sab ang mga therapeutic services sama sa reflexology ug sa mga gitanyag sa Children and Adults in a Multitude of Play-therapy (CHAMP), usa ka NGO nga gipanguluhan ni Rtn. Tynee Ruedas nga nagabag sa mga batang may kapansanan, siya midugang.
May pipila sab nga nakapatupi, samtang gibasahan sa mga batan-on og mga sugilanon ang mga kabataan gikan sa mga namatalang basahon.
Mipadayag si Soria nga wala na nila gamita ang pulong nga medical mission apan Grand Health Check agi og pagduso sa mensahe nga dili kinahanglan nga magpatambal lamang kung sila may gibati nga sakit.
“Kami nagtuo nga mas maayo alang sa usa nga magmahunahunaon sa panglawas ug unhan sa pagsagubang ang mga kondisyong pisikal ug mental harun mahimong mas mapanalipdan kay sa magpagkawala lang,” mipahayag si Soria.
Mitagad sa mga pasyente ang 42 ka mga doktors, lakip na sa mga sakop sa Santo Niño Medical Team, duha ka mga dentista ug 35 ka mga nurse, uban sa duha ka mga pharmacist, unom ka mental health professionals, 11 ka physical therapist, 20 ka reflexologist ug unom ka mga barbero.
May miboluntaryo sab nga mga sakop sa Operating Room Nurses Association of the Philippines (ORNAP) Cebu chapter, University of San Carlos (USC) Kauban, Velez College, Vicente Sotto Memorial Medical Center, Perpetual Succour Hospital ug Gruppo Hearing Team.
Giniyahan sa “Be The Inspiration” nga tema sa Rotary International karong tuiga, miabag sa kalihukan ang lima ka mga sakop sa RC Mandaue East pinanguluhan ni Rtn. Philip Estocada sa 12 ka mga sakop sa RCMC gipasingunhan sa sumosunod nga pangulo nga si Rtn. Bobby Pacan.