Rebolusyon ug ang TRAIN law
Mi-warning si Senador Panfilo “Ping” Lacson niadtong Dominggo sa usa ka rebolusyon nunot sa pagsaka sa presyo sa hapit tanang palaliton nga gipasangil sa pagpatuman sa Republic Act (RA) 10963, ang Tax Reform for Acceleration and Inclusion (Train) Act.
“When the stomach protests, prepare for revolution,” matod pa ni Lacson. Kon ang tiyan na gani ang moprotesta, pangandam alang sa rebolusyon, usa ka kasinatian, matod pa niya, di lang sa atong nasod, kon di, bisan sa mga nasod sa Latin America.
Ang atong mga balaod makaapektar sa atong inadlaw nga panginabuhi. Ang mga balaod kriminal makaapekto lang kon makalapas kita niini. Apan ang balaod mahitungod sa buhis makaapektar sa tanan.
Ang labing klarong naapektohan sa Train law mao ang presyo sa mga produkto sa lana tungod sa bag-ong P3 nga buhis sa matag litro sa kerosene, P2.50 sa matag litro sa diesel ug bunker fuel ug P1 kada kilo sa liquefied petroleum gas (LPG).
Umentohan pa gyud ang buhis sa kerosene ngadto sa P4 sa 2019, diesel ug bunker fuel og P4.50 ug ang P2 matag kilo sa LPG. Sa 2020, ang buhis sa matag litro sa kerosone mosaka ngadto sa P5, P6 sa diesel ug bunker fuel ug P3 kada kilo sa LPG.
Ang Train law mipahamtang sab og buhis nga P7 kada litro sa unleaded premium gasoline, regular gasoline ug pyrolysis gasoline.
Daghang mga magbabalaod nga nisugyot sa pagsuspenso sa pagpatuman sa Train law. Apan si Quirino Rep. Dakila Carlo Cua, ang pangulo sa gamhanan nga ways and means committee sa House of Representatives, niingon nga lisod ang pagpangita og ikahulip sa gipaabot nga kitaon niini.
Samtang si Senate President Pro Tempore Ralph Recto niingon nga ang Train law adunay “self-executory” provision sa pagpahunong sa excise tax sa mga produkto sa lana kon ang presyo sa crude oil moabot og $80 ang barrel. Automatic, morag circuit breaker.
Ang presyo sa Dubai crude nibatog na sa $75 matag barrel. Kon mapahunong ang pagsaka sa presyo sa mga produkto sa petrolyo, ang presyo sa ubang mga palaliton, mapahunong sab kaha? -
Ang labing klarong naapektohan sa TRAIN law mao ang presyo sa mga produkto sa lana,”