Makuha ang gusto

Way preno preno si Cehu City Mayor Tomas Osmeña nga nipahibawo sa mga sakop sa media nga iyang iduso pagbalik ang P18 bilyunes nga pagpalambo sa Kawit Island sa South Road Properties. Ang Konseho nga gidominar sa oposisyon wa mouyon sa Joint Venture Agreement tali sa Siyudad ug Universal Hotels and Resorts Inc. nga maoy mopalambo sa siyam ka hektaryang isla. Alang sa oposisyon alkanse ang Siyudad sa mao nga kasabutan. Apan karong Hulyo, mausab na ang kamada ug hangin sa Konseho kay mahimo nang mayoriya ang Bando Osmeña Pundok Kauswagan (BOPK) human sa paglingkod unya sa ex-officio members gikan sa Association of Barangay Councils (ABC) ug Sangguniang Kabataan Federation (SKF).

Mao ni ang rason nganong naninguha ang mayor nga mayoriya sa iyang mga kaalyado modaug sa miaging barangay ug Sangguniang Kabataan elections. Unyag iya na ang mayoriya, kon unsay iyang iduso ngadto sa Konseho, makalusot kini bisan pa og babagan sa Barug Team Rama.

Yak-an lang ni Osmeña ang kasabutan ning buwana kay sa Hulyo, seguradong makalabang na kini nga way kausaban suma sa iyang gusto.

Di lang kay kini unya ang seguradong uyonan sa mayoriya, ang umaabot pang mga transaksyon ug proyektong iduso sa executive department nga moagi sa botasyon sa Konseho. Sama ra ni sa nahitabo kaniadto dihang kaalyado pa sila ni kanhi mayor Michael Rama.

Igo ra unya sa pagyawyaw ang oposisyon sa ilang mga pagsupak ug pagsaway tungod kay dominado na sa BOPK ang Konseho.

Kay mayoriya na, unsay gusto ni Mayor Osmeña iya nang makuha nga way kausaban bisan usa, di sama karon. Milampos gyud si Osmeña ning ikaduha niyang higayon sa pag-ilog sa numero sa Konseho kay napalpak siya sa unang pagsuway.