Margot adik? Mike praning?

Nagtinubagay sila si kanhi mayor Mike Rama ug ang “kanhi laos nga pulitiko” human hinganli ni Rama nga usa ka adik ang asawa nga konsehal niini. Dugay naman kining maong isyu batok ni Konsehal Margot Osmeña nga adik kuno. Ang unang mipagawas ning maong pamasangil mao usab ang asawa sa usa ka kanhi mayor sa dihang nag-away sila. Diha man gani pod toy isyu nga gipasanginlan nga nag-shoplift o nangawat si Margot sa usa ka department store.

Pero ang maong isyu wala mapamatud-i. Karon ang maong isyu batok sa konsehal gibuhi na pod. Matod pa ni Rama nga napugos siya pagbuhi og balik ning maong isyu gumikan kay kanunay’ng tawgon nila ang Team Rama og “Team Suyop.” Kini luyo sa mga pagduda nga tiggamitan og illegal nga drugas si Mike.

Kini human usab hinganli si Rama ni Presidente Duterte mismo nga drug protector. Karon dili lang drug protector kon dili drug addict gyud. Gumikan usab kini sa mga kalihukan ni Rama nga maka-ingon na hinuon ang publiko nga drug user siya. Asa man ka mangita ana nga mag-traffic unya naka-Amerikana.

Mohigda og lantay. Momando sa mga maestra, kapitan ug mga tanod nga paligid-ligiron. Unya naa pay enistoryahan nga morag wala pa makatugpa. Pun-an pa nga miniwang. Punan pa gyud sa iyang estorya nga ang Ginuo nakigsulti kaniya nga padaganon siya og balik.

Pero morag mga bata sila nga walay buot. Kining maong matang sa isyu pagka-walay hinungdan. Walay makuha ang lungsod niini. Mabaw ra kaayo sila og paminsar. Aw, hinuon, mao man usab kini ang gusto sa mga tawo kanang mag-away gyud ang mga magka-atbang nga mga pulitiko. Kanang “sabong mentality” ba. Kanang morag nagtan-aw og tigbakay.

Maayo pa siguro nga ang ilang lalisan mao ang isyu nga may labot ang lungsod. Kana bang adunay makuha ang publiko kay sa walay pulos nga isyu.

(bobbygnalzaro@ gmail.com)

Pero morag mga bata sila nga walay buot.