Eleksiyon 2019

Human na ang piniliay sa Sangguniang Kabataan (SK) federation. Dinhi sa Cebu City nangharus ang mga mipasilung sa Bando Osmeña Pundok Kauswagan (BOPK) batok sa Barug PDP-Laban ug Team Rama. Way bisan usa na lang ka kandidato sa oposisyon ang midaug sa maong federation election. Tungod niini mapun-an na usab og usa ka sakop sa BOPK ang konseho kay molingkod man pagka-konsehal ang midaug nga SK federation president.

Sa dili madugay, magpili na usab og presidente sa Association of Barangay Councils (ABC). Gipaabut nga laing tawo ni Mayor Tomas Osmeña, ang bag-ong napili nga Barangay captain o chairman sa Kasambagan, Franklin Ong, ang paluyohan sa mayor ug sa BOPK. Tungod kay daghan mang mga midaug nga mga dumadapig sa BOPK, ila na usab unya ang usa ka lingkuranan sa konseho sa siyudad nga gireserba alang sa modaug pagka-ABC president. Dinhi matuman na ang dugay nang gipanganduy ni Osmeña nga dominahun ang Cebu City Council. Dili na mababagan ang mga proyekto sa mayor labi na gayud ang pag-ugmad sa Kawit island.

Kining resulta sa milabay nga barangay ug SK elections daku nga leksiyon alang sa oposisyon sa Cebu City. Kinahanglang maminaw sa mga political strategists ang PDP-Laban aron motabang sa pagtambag sa mga pulitiko kon unsay maayong buhaton dili kay magpakabuot lang kon unsay ilang gusto.

Nasayran nga niadtong miaging barangay eleksiyon dihay buot mokandidato pagka-kapitan nga mopasilung unta sa Barug Team Rama basta dili lang sila butangan og kaatbang. Wa sila modawat sa maong tanyag nga miresulta na hinuon sa pagka-parut sa ilang kandidato. Subra ra sila pagsalig sa ilang popularidad nga walay napakita.

Kon gilupig sa maong eleksiyon ang oposisyon nga wa pa gani mabungkag, unsa na kaha unya og duha na kanila ang molansar pagka-mayor batok sa incumbent mayor?

Kinahanglang gamiton sa PDP-Laban ang pwersa sa mga batan-ong konsehal sama kanila ni Raymund Garcia, Junjun Osmeña, Joey Daluz ug uban pa aron sa paghimug mga pamaagi aron ilang mabawi kadtong dili maayong resulta sa miaging eleksiyon. Karon, more than ever, gikinahanglan sa PDP-Laban nga disiplinahun ang ilang mga sakop aron dili mosamot og kalibug ang ilang mga dumadapig.

Kon magpabilin kining gipakitang way pagpanaghiusa sa oposisyon nahadluk ako nga mas grabe pa ang ilang dangatan sa election 2019.

Samtang si kanhi mayor Mike Rama miinsister gayud nga modagan siya sa pagka-mayor sa sunod piniliay iya nang gipahibawo, bisan wa niya nganli ang iyang grupo sa mga kandidato. Usa kini sa makapaikag sa iyang mga dumadapig sa pagduso gayud sa iyang kandidatura bisan kon mipahibawo siya nga ilang pa kining sabutan sa grupo.

Sa BOPK, akong nadunggan nga ang bag-ong napilng barangay kapitan sa Kasambagan Franklin Ong maoy padaganon og bise mayor ni Osmeña. Mao kini sukwahi kay sa BOPK, si Osmeña ra ang daku og tingog samtang sa oposisyon naa si Mike Rama, Bise Mayor Edgar Labella ug Presidential Assistant for the Visayas Secretary Mike Dino. Makalibog.