You’re always in my heart
Nakadesisyon ko nga palabyon ko ang pipila ka adlaw una ko makig-estorya kang Ronnie. Bisag unsaon niya pagtago ang iyang gibati, apan klaro gyud nga nangabubho siya kang Remuel. Ug ako sab, duna may nahimong sayop. Mas hatagan ko untag panahon si Ronnie kay kang Remuel kay boyfriend ko man siya.
Paglabay sa duha ka adlaw kay wa man gyud mokontak si Ronnie nako sa selpon, ako na ang mitawag niya.
Ning higayona iya na kong gitubag.
“Magkita ta, Ron.” Tingali namatngonan ni Ronnie nga seyuso gyud ko, misugot siya. Buntag niadtong tungora. Maoy among sabot nga sa Plaza Independencia mi magkita anang pagka hapon. Medyo miluag ang paminaw ko sa akong dughan.
Tuod man, miadto ko sa lugar nga among gikasabotan ni Ronnie anang pagka hapon. Nakita ko siya nga naglingkod sa sementadong lingkoranan ubos sa dakong punoan sa kahoy. Nag-una diay siyag abot nako? Naghinuktok siya.
“Ganina ka ra, Ron?” Wa makamatikod ang akong boyfriend sa pagduol ko niya. “Lingkod diri tapad nako.” Nag-smile si Ronnie apan sa iyang mga mata namatikdan nako nga duna siyay gibating kaguol. Mitapad kog lingod niya.
“Sorry, ha, Ron. Unsaon man gud, childhood friend ko si Remuel ug gusto siyang makigpanuroy nako. Wa man siya masuheto sa mga nindot nga lugar dinhi sa ato, maong gikuyogan ko siya kanunay.”
Wa ko magdugay sa pagpasabot kang Ronnie. Mipahiyom siya. Unya iya kong gigabling. Gigakos ko niya. Nalipay ko kay sa akong paniid, nakasabot si Ronnie.
“Kalimti na to. Pero duna lang koy gustong mahibaw-an nimo, Sha. Unsay gibati mo karon nga mibalik na si Remuel sa Canada?” “H-Ha?” Nakugang gyud ko, uy. Wa man gud ko magdahom nga makapangutana si Ronnie nako sa ingon. Wa dayon ko makatubag. Unsa ba tuod ang gibati ko karon nga mipauli na sa Canada si Remuel? Naglibog ko. Wa ko makasabot sa akong gibati. Sa pagkatinuod lang, gimingaw ko kang Remuel. Kanunay ko siyang mahunahuna. Apan di angay nga makahibawo si Ronnie ani kay mosamot nga bation niya ang pagpangabubho.
“As usual, Ron. Nalipay ko nga nagkita mi. Ug karon nga wa na siya, wa na sab ko maghunahuna niya.”
Wa motubag si Ronnie. Gitutokan ko niya pag-ayo. (SUMPAYAN)