MAGTIAYON MOREKLAMO BATOK SA HOSPITAL STAFF

Karong adlawa umulon sa Department of Health (DOH) 7 ang fact-finding team aron mosusi sa pasangil nga gibalibaran ug gibiaybiay sa mga personnel sa Lapu-Lapu District Hospital ang usa ka magtiayon, nga ang asawa manganakay.

Namatay ang anak sa babaye nga nagsabak nga mao ang gidala sa tambalanan, apan gi-refer sa Vicente Sotto Memorial Medical Center (VSMMC).

Matod ni Danny Montecalvo, igsuon ni Rey, bana ni Delvet Delos Niños, kinsa mao ang nagbati, sa Superbalita Cebu kagahapon nga pursigido sila nga mosang-at og reklamo batok sa mga nurse nga giingon niyang ningkatawa kanila tungod sa kakabus.

Apan kining tanan gihimakak ni Dr. Cliff Canton, chief of hospital sa LLCDH, ug nihulagway niining pasangol nga “unfair.” .

Dugang ni Montecalvo nga naabunohan na og dugo si Delos Niños ug gikatakda nga nigawas na kini sa tambalanan gabii.

Si DOH 7 Regional Director Jaime Bernadas nibutyag nga nakahibawo siya sa isyu pinaagi sa report sa pamantalaan.

Kagahapon, human kini niya mabasa, gi-forward dayon kini nila sa ilang legal ug regulation team aron masusi..

Pinaagi sa maong report, didto magsugod ang ilang fact finding team sa pakisusi.

Tambag ni Bernadas sa pamilya nga kon mosang-at og reklamo, modiretso sa buhatan ni Lapu-Lapu City Mayor Paz Radaza tungod kay anaa sa kagamhanan ang pagdumala niini.

Hinuon nipahibawo siya nga mamahimo nga makasumiter sa ilang reklamo sa regional office ang magtiayon./