MOPALUSOT UNTA SA CITY JAIL NAPATAY
JAIL OFFICER NAMUSIL HUMAN ‘GITIONAN’; 1 PATAY, 1 ANGOL 2
■NAGBUY-OD. Nagbuy-od ang lawas sa usa ka Jake (wala) uban sa motorsiklo human siya ug ang iyang kauban napusilan ni Jail Officer 1 Myron Garcia tungod sa giingong suway nga pagpalusot og mga kontrabando sa Cebu City Jail sa Barangay Kalunasan, Dakbayan sa Sugbo kagahapon sa buntag. Si Garcia (tuo) nipasangil nga gitionan siya og armas sa usa sa upat ka mga lalaki mao nga napugos siya sa pagpusil kanila. Si Jake nga naigo sa ulo namatay.
Usa ang patay ug usa usab ang angol sa dihang napusilan sa usa ka jail officer sa Cebu City Jail ang duha sa upat ka mga tawo nga giingong human ningsuway sa pagpalusot og mga kontrabando sa bilanggoan kagahapon pasado alas onse sa buntag.
Namatay ang usa ka alyas Jake pipila ka metros diin siya napusilan human makaangkon og samad sa ulo ug dughan samtang samdan sa walang tiil si Arnel Candumay, iyang kauban.
Sa imbestigasyon sa Guadalupe police station, giingong ningsuway pagpalusot sa mga ni-ream nga sigarilyo ang duha agi sa luyo sa bilanggoan pinaagi sa paglabay sa pisi nga himuong tugot.
Apan usa ka jail officer nga nagbantay sa Tower 2 nakabantay sa ilang gihimo, dali sila nga gisita, apan giingong usa kanila nanion sa dala nga armas.
Tungod sa pagtuo sa jail officer nga siya ang mapusilan, iyang giunhan sa pagpabuto aron mahadlok ug modagan.
Si Jail Officer 1 Myron Garcia nagkanayon nga igo ra unta niyang abogon ang duha pinaagi sa pagpasalba ug wala siya magtuo nga iya ning maigo nga miresulta na hinuon sa kamatayon ni Jake.
“Self defense lang yun kase tinutokan ka man. Nag warning shot ako. Di sila nakinig so yun pag ano nila, inunahan ko na lang but no intention na barilin sila,” matod ni Garcia.
Pipila ka metros gikan sa luyong koral sa City Jail nag-atang ang motorsiklo nila ni Candumay nga himuon nilang getaway.
Sa dihang milanog ang duha ka buto, daling nanagan ang duha padung sa ilang motorsiklo aron mosibat, apan pag-abot sa unahan natumba na sila tungod sa samad nga ilang naangkon.
Nakuha sa kapulisan ang kontrabando nga ni-ream nga sigarilyo nga gisulod sa plastic, cellular phone, lighters, gamit sa pagsuyop ug gabas nga mobalor ang tanan og P220,000.
Si Candumay naa na sa Vicente Sotto Memorial Medical Center nga gibantayan sa taga Bureau of Jail Management and Penology (BJMP).
Matod ni Sr. Insp. Edward Sanchez, hepe sa Guadalupe police station, nga naa karon sa kustodiya sa ilang buhatan si Garcia aron ipaubos pa sa imbestigasyon.
Magpaabot pa sila sa resulta unya niini una pa sila mohukom kon angay bang dakpon si Garcia o naghimo lang kini sa iyang trabaho.
“Ongoingpa ang atong investigation ani niya. Nakita nato nga nag perform lang sa iyang duty ni siya kay nahitabo man sa ilang area,” matod ni Sanchez.
Gidayeg ni Cebu City Councilor Dave Tumulak nga si Garcia nga nakapusil sa mga suspek sanglit dugay na sila nagpahimangno sa tawo nga nagpalusot og kontrabando nga undangon na kini aron dili sila ma disgrasya.
“Pasalamat mi sa jail officer sa hugot nga siguridad daan naman nga mipahimangno ang city government niadtong mga tawo nga maghimog palusot nga hunongon na aron dili sila ma disgrasya,” matod ni Tumulak.
Sa impormasyon nga tungod sa kaestrikto na sa pagpasulod sa mga kontrabando, misamot ka mahal ang sigarilyo sa sulod sa bilanggoan.
Kon kaniadto ang stick sa sigarilyo moabot sa tag P100, karon tag P200 na diin ang usa ka kaha moabot na sa tag P4,000 nga mas mahal pa sa illegal nga drugas. /