'Tiggamag' paltik sa Danao nasikop
Nasikop sa mga sakop sa Provincial Intelligence Branch inabagan sa Danao City Police Station ang usa ka mamuhatay og paltik nga armas sa Dakbayan sa Danao kagahapon sa buntag pinasikad sa search warrant nga giluwatan sa korte sa syudad sa Toledo.
Ang nasikop mao si William Hontilla Morato, taga Sto. Tomas Village, Barangay Tuburan Sur, Siyudad sa Danao diin nakuha sa iyang posisyon ang mga hinimo niining armas nga kalibre .45 nga pistola.
Lakip sa nasakmit ang kwarta nga mobalor og P23,000 nga gituohan nga halin gikan sa iyang mga kustomer.
Ila usab nga nakuha ang mga resibo sa usa ka money remittance nga timailhan nga gipaagi sa money courier ang pagbayad bugti sa hinimo niining paltik nga armas.
Matod ni Sr. Supt. Manuel Abrugena, hepe sa Cebu Provincial Police Office, nga niangkon ang dinakpan nga duha ngadto sa tulo ka mga tuig na sa iyang illegal nga negusyo.
Gipasubay pa kini karon niya kinsa ang mga personalidad nga naa sa resibo nga iyang gibaligyaan sa armas aron mapaubos sa imbestigasyon.
“We ate still conducting investigation base doon sa mga documents. As of now, we cannot identify the names because we are conducting follow up operations,” matod ni Abrugena.
Giangkon ni Morato ang pagsulod sa illegal nga negosyo sanglit mao ra kini ang iyang naantigohan nga trabaho.AYB
Matod niya nga gamay lang ang iyang kita nga maoy ilang kuhaan sa konsomo sa pamilya.
“Wala man koy laing nakamahoan nga trabaho, Sir, mao nang maghimo na lang kog armas,” matod ni Morato sa Superbalita Cebu.
Ang hepe sa Police Regional Office 7 Chief Supt. Debold Sinas niingon nga nasayod na siya nga nahimong livelihood ang pagpanghimo og armas sa syudad sa Danao.