Mayor Apura gireklamo

Maestra sa usa ka publikong tunghaan nipasangil nga giingong gi-harass ni Carcar City Mayor Nicepuro Apura sa miaging semana tungod sa gikabangian nga 3,828 metro kwadrado nga yuta sa Sitio Lamakan, Barangay Valladolid sa maong siyudad.

Si Marlene Cantiberos Entienza, 48, magtutudlo sa Ocaña National High School, nitug-an sa mga tigbalita nga mopasaka sila og mga kasong kriminal ug administratiba batok ni Apura sa Office of the Ombudsman for the Visayas.

Siya nibutyag nga gusto sa mayor nga papahawaon sila sa luna nga ilang gipuy-an ug nitanyag nga i-relocate sila sa Sitio Tawog sa samang barangay.

“Dili ko mosugot kay amo man ni, bisan unsaon amo gyud ni,” padayag ni Entienza sa pakighinabi sa mga tigbalita kagahapon, kuyog sa iyang bana nga si Francisco Entienza, 40.

Apan si Apura, sa pamahayag nga gi-post sa Facebook account ni Candice Sandiego Acuña, information officer sa kagamhanan sa siyudad sa Carcar, niasoy nga napalit niya ang unom sa pito ka mga bahin sa luna o tag 546 metro kwadrado nga gidak-on matag usa gikan sa unom ka mga igsuon ni Ernesto Cantiberos, amahan ni Entienza.

Sa kopya sa Deed of Absolute Sale nga gipakita ni Entienza ngadto sa mga sakop sa media, napalit ang maong mga bahin sa luna nga may kinatibuk-ang gidak-on nga 3,282 square meters sa kantidad nga P1.2 milyones gikan sa mayor, asawa niini nga si Mercedita Apura ug anak nga si Anthony John Apura niadtong 2017.

“I felt harassed because inspite of being the rightful new owner of the lot, they were the one who threw insults at me and even took a video of me without my consent,” pahayag sa mayor sa maong post.

Apan sumala ni Entienza nga ang mga bahin sa lote sa iyang lima ka iyaan ug usa ka uyoan kay napalit na sa iyang amahan nga si Ernesto ug inahan nga si Brenda niadto pang 2014 sa tag P25,000 matag usa.

Kamatuoran niini, matod niya, ang waiver of rights nga gipirmahan sa mga igsuon ni Ernesto nga pinetsahan og Septiyembre 10, 2014.

Siya nidugang nga wa pahibaw-a ang iyang amahan nga gibaligya diay sa mga igsuon niini ang bahin sa ilang lote nga napanunod sa ilang mga ginikanan nga sila si Alfonso Canteveros ug Francisca Sabanal.

Si Entienza nangangkon nga si Apura kuyog sa mga tawo niini, niadto sa ilang propiyedad niadtong Mayo 31, 2018 ug gipaputol ang 15 ka mga punoan sa chicos, usa ka punoan sa tambis ug usa ka punoan sa nangka nga way gipakita nga court order.

Dali siya giteksan sa iyang anak nga babaye sanglit didto siya sa tunghaan niadtong higayona ug sa iyang pag-uli nahitabo ang tinubagay nila sa mayor.

Ang panghitabo nakuhaan og video sa iyang anak nga lalake nga nilungtad og kapin sa dos minutos ug gi-post sa Facebook page sa iyang anak nga babaye.