P469 milyones nga SB aprobado sa konseho

Giaprobahan sa konseho sa dakbayan sa Sugbo ang P469 milyones nga supplemental budget (SB) number one nga gipangayo ni Mayor Tomas Osmeña para pagdugang sa pundo sa siyudad nga igasto sa programa ug proyekto.

Wala na moagi og daghang debate sa pagtugot sa paggasto sa maong kantidad bisan kon mayoriya sa konseho dili kaalyado sa administrasyon.

Apan si Konsehal Joy Pesquera sa Team Rama nipadayag nga usa sa gikuhaan og salapi para himuong source of fund sa SB1 mao ang pag-realign sa P25 milyones nga proyekto unta para himuong eskwelahan sa barangay Calamba.

Ang maong project gihulagway ni Pesquera nga mahinungdanon sanglit ang Calamba usa sa mga barangay nga daghan ang mga tinun-an ug sagad kanila tua ni-eskwela sa barangay Guadalupe ug Abellana National School ug City Central School.

Si Konsehal Margarita Osmeña kinsa maoy chairman sa committee on budget and finance nidepensa ug niingon nga ang maong pundo niadto pang tuig 2009 apan hangtod karon wala pa gigamit ang maong kantidad.

Ang chairman sa committee on education nga si Konsehal Joy Augustus Young nihatag og katin-awan bahin sa maong proyekto ug niingon nga nga wala magamit ang maong pundo sanglit ang Cebu City Government wala pa makapalit og yuta para tukoran sa maong eskwelahan sanglit adunay problema sa titulo sa yuta.

Ang asawa sa mayor nga si Margarita niingon nga kon kinahanglanon ang maong pundo para sa maong proyekto, dali ra kining magahinan sa dakbayan.

Sa giaprobahan nga SB1, P208 milyones niini gigahin para sa financial asssistance sa 67,300 ka mga senior citizen, P58 milyones para sa ayuda sa pipila ka barangay, P20 milyones para sa buhatan sa City Administrator, P15.2 milyones para sa bayranan sa kuryente ilawom sa Department of General Services, P12.6 milyones para sa traffic enforcement sa siyudad ug uban pa.