Pagbasura sa kaso batok ni Miro gikalipay sa Mayor
Gikalipay ni Cebu City Mayor Tomas Osmeña ang pagbasura sa kaso batok kang kanhi City Market Administrator Winefredo Miro kinsa maoy gipasanginlan nga mastermind sa pag-ambush-patay kang Ermita Barangay Captain Felicisimo “Imok” Rupinta.
Matod niya nga ang maong kaso usa ka “purely harrassment” sa pikas partido ug gihimo lamang kini aron sa pagduot kaniya.
Kahinumdoman nga adunay pagtuo si Osmeña nga ang tinuod nga mastermind mao ang live-in partner ni Imok nga si Jocelyn Mendoza sanglit mao kini ang nagkontrol sa mga katigayunan sa kanhi kapitan ug dili siya ang tinuod nga asawa niini.
Dugang ni Osmeña nga adunay dakong kalambigitan kabahin sa drugas si Rupinta ug klaro kuno kaayo kini kay mikatap ang drugas sa iyang panahon.
“…and Yawa, one of the biggest drug lord in Central Visayas … (is) using Ermita as the base and how could trhe barangay captain not know what’s going on,” saysay ni Osmeña.
Sa pagkakaron, personal nga gikuha ni Osmeña si Miro alang sa iyang plano nga pagbutang og piggery sa Shell Island.
“I’m just looking at how to take advantage of the fact that Carbon market is (producing)….. about 10 tons of vegetable wastes a day,” matod sa mayor.
Iyang gitahasan si Miro sa pagtuon kung unsaon pag-convert sa mga vegetable wastes nga mahimo kining feeds.
Nagkanayon si Osmeña nga ang mga vegetable wastes magamit isip feeds sa mga baboy.
Dako ang iyang pagtuo nga makatabang kinig dako sa siyudad tungod sa nagkadakong demand sa lechon.
Sa nasayran, si Miro giambush-patay niadtong Nobiyembre 23, didto sa Lilo-an sa dihang padulong na unta kini nga mouli sa ilang panimalay.