Kalangay sa processing sa Philhealth gihatagan na og pagtagad

Giangkon sa usa ka opisyal sa Philippine Health Insurance Corp. (Philhealth) 7 nga tungod sa kahinay sa connectivity sa bag-ong sistema nga gipatuman sugod karong tuiga, nakasinati sila og kalangay sa pag-process sa mga insurance claim sa mga pasyente gikan sa mga accredited nga mga ospital ug ubang medical facilities.

Apan si Atty. Karisma Ivee Agraviador, public relations officer sa Philhealth 7, nipasalig nga gihimoan na kini og aksyon sa ilang buhatan pinaagi sa pagdugang og personnel ug pagpa-overtime sa mga empleyado aron ma-process ang mga claim.

Matod niya, gumikan sa kahinay sa connection sa ilang buhatan naabtan og tulo ka buwan ang pag-process sa claims sa mga hospital ug ubang pacilidad gikan sa 60 ka adlaw nga maoy ilang standard processing time.

“Pagsugod nato og experience ani, nag-implement ta dayon og mga measures like overtime. Dili man dayon ma-address diri sa region ang katong connectivity issue nato kay nag-implement man gud ta og electronic claims nga processing,” matod ni Agraviador.

Sa usa ka adlaw, 3,200 ka claims ang madawat sa Philhealth 7 nga maoy i-process aron mabayran.

Siya niasoy nga gisusi na sa Information Technology (IT) staff sa ilang central office ang problema sa ilang sistema ug napalambo na ang processing time niini, apan dili pa diha- diha makita ang impact niini kay bag-o pa lang.

Ang sistema nga iyang gipasabot mao ang gitawag og e-Claims Submission System sa Philhealth diin ang accredited hospitals ug non-hospital facilities dili na kinahanglan moadto sa ilang buhatan aron manual nga i-file ang claims ug ipadala kini pinaagi sa online sa Philhealth Web Service diin ang mga empleyado na sa ahensiya ang mo-download aron ma-process ug mabayran ang claims.

Si Agraviador nipasabot niini human giingong dunay 68 ka mga tambalanan sa tibuok nasod ang nireklamo nga dugay nabayran sa Philhealth ug nihulga nga kanselahon ang ilang accreditation kon dili sila mabayran sa insurance claims sa ilang mga pasyente.

Si Dr. Rustico Jimenez, presidente sa PHAP nga nahinabi sa sibyaanan sa kaulohan, nibutyag nga moabot sa P7 bilyones ngadto sa P9 bilyones ang wala mabayri sa Philhealth sa 15 ka mga ospital.

Apan sa nahibaw-an sa ulohang buhatan sa Philhealth, dunay 24 ka mga ospital nga naa sa listahan nga dunay kinatibuk-ang bayranan nga claims nga moabot og P743.3 milyones.

Dinhi sa Sugbo, dunay usa ka clinic sa siyudad sa Carcar (pangan gipugngan samtang wala pa makuhai sa habig) ang naapil sa listahan nga giingong P5 milyones ang bayranan nga claims sa Philhealth.

Apan dihang gisusi kini sa Superbalita Cebu kagahapon, ang maong clinic kay wala maapil sa listahan sa mga pacilidad nga accredited sa Philhealth 7.

Sa maong listahan, usa na lang ka clinic nga nagbase sa Carcar ang accredited sa Philhealth karong tuiga kay ang laing duha na-expire ang accreditation niadto pang Disyembre sa miaging tuig.

Si Agraviador niingon nga kon naay wala mabayri, mohatag lang ang pacilidad sa listahan sa unpaid claims aron ilang masusi sa record kon nabayran o na-deny ba.