Kaw-it sa Kawit
Balikon ni Mayor Tomas Osmena ang Joint Venture Agreement (JVA) tali sa United Hotels and Resorts, Inc. ug siyudad alang sa usa ka kalambuan diha sa Kawit island.
Tukuron diha sa Kawit ang commercial shopping complex, convention center, 3 hotels, theatre for performing arts, resorts and gaming facilities (pasugalan) ug usa ka parke.
Ang tanan mokantidad og P18 Billion nga tin-awng makausbaw sa ekonomiya sa siyudad ug makapasud og trabaho sa linibo ka mga Sugbuanon.
Apan sa miaging buwan natikalbong ang JVA human wa aprobahi sa konseho diin ang mayoriya mao ang oposisyon (Barug Team Rama).
Milihok si Tomas sa Kawit deal kay nakalantaw siya nga sa Hulyo momayoriya na ang BOPK. Iya na ang SK Federation chairman ang sunod mao na sad ang ABC chair.
Mao niy nakakagwang sa pulitika. Dayog babag-babag og kaayuhan nga pasiugdahan sa kaatbang. Di gusto mabintahaan sa mata ug pagdayeg sa katawhan.
Apan morag nakaamgo na ang Team Rama sa kaayuhan nga maani sa Kawit deal. Ug may katarungan si Konsehal Joel Garganera nga straight lease ang base
sa income sa siyudad kay di permanente ang 90-10% sharing.
Ang sharing system mag-agad man sa total income sa business complex nga temporaryo ang kahimtang. Samtang ang abang
fixed ug di matandog. Si konsehal Raymund Garcia nagpalanog sa 2/3 majority rule sa botasyon di kay simple majority lang (1/2 +1) ang modaog. Si Konsehal Jose Daluz niingon nga ang mosangat pagbalik sa resolusyon gikan gyud sa ningsupak.
Angay sad ning hunahunaon sa mayor. Apan kay milugak na ang opposisyon di na dakong babag ang motagbo sa BOPK sa tinguha pagpalampos sa Kawit deal.
Ang kalambuan gikan sa Kawit deal di kay kalampusan lang sa BOPK maapil pud ang opposisyon kay ning higayuna sila nagkahiusa sa usa lamang ka tumong nga mao ang kaayuhan sa katawhan sa siyudad.
Dalaygon ang mayor kay mikaw-it gyud siya sa Kawit. Kaniadto ang Kawit usa ka biniyaan, mangiob ug mingaw nga isla lamang nga maoy sukaranan sa popular nga radio drama sa DYRC sa 60’s ni Amading Abad, “Ang Ungo sa Kawit.”