Gustong manimpad sa siyudad

Dear Papa Joe,

Maayong adlaw nimo ug sa tanang suki niining imong column. Ako diay si Adelito nga taga Leyte. Bag-o ra gyud ko ni graduate og high school diri sa among probinsiya. Pero tungod lagi kay pwerting pobreha sa akong mga ginikanan, imposible nga makapadayon kog eskwela sa college nga mao gyud unta akong pangandoy sa tibuok kong kinabuhi. Taas unta akong panglantaw sa kaugmaon, labina nga utokan pod ko.

Ang akong mga ginikanan, nag-ingon nako, nga ari lang ko sa amo mangopras, magbaol, mangahoy ug uban pang mga trabaho nga pangbukid. Bisag ako na silang gipasabot nga mas dako ang tsansa sa umento sa kinabuhi kon moadtog syudad, pero lisod man kay wala koy kasak-an kon moanha kog Cebu, wala ko masuweto ug basin unsa pay dautang mahitabo nako. Usahay ingnon pa ko sa akong Tatay, basta mahubog nga wala na gyud kuno koy pagasa, kay kon uno ko, hangtud sa uno ra gyud ko kutob.

Motuo ba ka aning giingon sa akong amahan, Papa Joe, nga kutob ra gyud kog uno? Sundon na lang ba nako sila nga magpabilin ko diri sa among bukid or maayo kahang manimpad ko og syudad? Palihug tambagi ko.

ADELITO

Dear Adelito,

Para nako dili tinuod ang giingon sa imong amahan nga kutob ra ka sa uno. Pwede pa kang moabot og dos, singko, or bisag unsa katas-a depende sa imong paningkamot. Kon sa paminaw nimo diri sa siyudad nimo matuman ang imong pangandoy, then sakto ang imong giingon nga manimpad ka. Unsaon man nimo pagtikang sa ikaduhang angang kon dili nimo isikad ang imong mga tiil?

Karong panahona, tagsa nalang kaayo ang giingon nilang suwerte. Ang kinahanglan ron mao ang kakugi ug paningkamot, inubanan sa hugot nga pag-ampo sa Ginuo. Ang akong ikatambag nimo mao nga sunda ang imong damgo ug saligi ang imong kaugalingon. Ubani usab kini sa hugot nga pag-ampo sa Ginuo.

PAPA JOE