Don’t ever make me cry
For the first time in my life, nagmahal kog lalaki. Daghan ang nag-ingon nga suwerte ang lalaki nga mahimo kong boyfriend kay brain and beauty kuno ko. Aw, tinuod man sab tingali kay sa among klase kanunay man kong masulod sa top three sa honor student, ug bahin sa beauty, tinuod sab tingali kay daghan man kog suitors.
Apan usa ra man ang ipitik sa kasingkasing, di ba? Ug si Jundee ang maong lalaki. Well, kon suwete si Jundee nga maoy akong gihigugma, only time can tell. Basig ako ang way suwete. Para gud nako usa ka sugal kining maong relationship. Kon sakyan sa suwerte, aw, successful ang maong relasyon.
Apan kon sakyan sa demalas, mao nay giingon nga ang tibuok kalibutan magkatawa sa imong kapakyasan.
Ug di ko gustong kataw-an sa akong mga amiga, kon pahilakon lang ko ni Jundee.
Usa ka hapon nga gikan ko sa eskuwelahan, gigutom ko. Ang duol nga fast food gikan sa akong nahimutangan maoy akong gidulong. Apan dihang mosulod na unta ko, wa ko makapadayon kay didto sa sulod nakita ko sila si Jundee ug Kuya Marlon nga nag-estoryahay samtang nangaon. Hapit na moalas siyete sa gabii niadtong tungora. Six thirty sa gabii ang katapusan kong subject everyday. Gituyo ko kini kay laayan ko sa among balay kon sayo kong mopauli. May nang gabii na kay tingpanihapon sa akong pag-abot sa balay ug human ani, pipila ka oras lang tingkatulog na.
Unsaon man gud ako ra man ang anak. Ug sila si Papa ug Mama tagdugay sab mopauli every night kay sila man ang nangunay sa pag-atiman sa among mga negosyo sa siyudad, sama sa pawnshop, bakery ug Boutique
Daan nang mga negosyante ang akong mga ginikanan since sa ilang pagminyo. Anak man gud silag dato ug human sa ilang kasal gihatagan sila sa tagsa-tagsa nila ka parents og dakong kuwarta nga ilang ikapuhonan sa negosyo. Pulos nakahuman sa kursong Commerce sila si Mama ug Papa.
Kalit nga mibutuk-butok ang akong dughan. Mipadaplin ko ug nagpahipi sa usa ka haliging semento sa usa ka establishment. Nagpaniid ko sa duha. Bildo ang bungbong sa fast food ug naklaro ko kaayo sila.
(SUMPAYAN)