Cesafi caging pre-season karong Hunyo 9

Ipahigayon karong Hunyo 9 hangtod Hulyo 12 ang Cebu Schools Athletic Foundation Inc. (CESAFI) Pre-Season Tournament sa Cebu Coliseum alang sa high school ug college divisions.

Sa matag division, ang partisipanteng mga tunghaan mosubay sa single-round robin unya inig human niini, ang mopatigbabaw nga duha mao

ang mag-abot sa best-of-three

championship series samtang ang magsunod nga duha mag-ilog sa ikatulong luna.

Ang high school defending champions University of Visayas (UV) Baby Lancers maoy mosugod sa torneyo pinaagi sa pagpakigbatok sa University of Southern Philippines-Foundation (USP-F) Baby Panthers sa Hunyo 9.

Human niini, mosunod ang duha ka mga engkuwentro sa college defending champions UV Green Lancers batok USP-F Panthers dayon ang sangka sa University of Cebu (UC) Webmasters batok Southwestern University (SWU-Phinma) Cobras at 5 p.m.

Ang mga nag-organisar mopahigayon og pre-season event aron maandan ang teams sa season nga opisyal nga sugdan karong Agusto 29.

Ipahigayon ang mga sangka sa pre-season matag Sabado, Dominggo, Martes ug Huwebes.

Ang mga tiket nagbalor og P80 sa lower box, P40 sa upper box ug P20 sa general admission.

Ang mga estudyante nga makapakita og ID libre sa general admission unya adunay 50% discount sa lower box ug upper box.