MABATID SA ABC CEBU CITY ?
Gihulagway ni Mayor Tomas Osmeña nga di kwalipikado nga magpapili si Barangay Captain-elect Niña Mabatid sa Barangay Mabolo pagka-presidente sa Association of Barangay Council (ABC) kansang election ipahigayon karong buwan sa Hulyo.
Kini human nitumaw ang pangalan ni Mabatid nga magpapili pagka-ABC president kinsa gidungog nga mobali ngadto sa Team Rama gikan sa Bando Osmeña Pundok Kauswagan (BOPK).
Si Osmeña niingon nga di kwalipikado si Mabatid nga maoy himuong pambato sa ABC habig sa BOPK sanglit wa pa siyay kasinatian sa serbisyo
publiko.
“She is not qualified. Why is she qualified? She never even served as a barangay tanod and she wants to be president
of ABC?” matod sa mayor. Ang BOPK aduna nay pambato sa pagka-ABC president ug siya mao si Barangay Captain-elect Franklyn Ong sa Kasambangan.
Si Mabatid sa iyang bahin niklaro nga wa siyay intensyon sa pagpapili sa labing taas nga posisyon sa ABC apan niingon nga adunay mga imbitasyon sa lainlaing grupo nga wa niya hinganli nga siya padaganon.
Gitug-an niya nga di na usab siya kinahanglan makig-atubang ni Osmeña aron klaruhon ang isyu sanglit iyang gihulagway nga abli ang ilang duha ka komunikasyon uban sa mga nagpalibot sa BOPK.
Ang bag-ong kapitan sa barangay Mabolo niingon nga sapagkakaron, wa pa siyay plano sa pagpapili pagka-ABC president ug iyang gibutyag nga kon modagan man siya sa maong posisyon, si Osmeña maoy labing unang masayod sa desisyon nga iyang pagahimuon.
Si Osmeña niingon nga wa siya giimbitar sa victory party ni Mabatid apan didto ang mga sakop sa Team Rama.
Apan si Mabatid niingon nga ang iyang victory party kadtong nangaligo sila og dagat ug way mga pulitiko nga giimbitar apan kadtong pista sa Mabolo, iyang giklaro nga didto silang Bise Mayor Edgardo Labella ug kaubanan sanglit silingan ra sila og pinuy-anan.
Si Phillip Zafra sa Barangay Tisa kinsa maoy incumbent president sa ABC subli gihapon nga magpapili sa maong katungdanan ug ang mayor nidasig kang Mabatid sa pagdagan.
“Let her run naay thrilling, good. Why will I stop the process of democracy, the more candidates the better. Right? Better for me also,” padayag ni Osmeña kinsa nagpahiyom.
Sa mga kapitan nga nanaog sa BOPK, si Mabatid ra ang wa nanumpa ni Osmeña sanglit didto siya ni Senate President Vicente Sotto III kinsa nisaad kaniya og mga proyekto alang sa barangay.
Gipadayag ni Mabatid nga iyang gitahod si Osmeña bisan kon iyang gihulagway nga wa siya tabangi sa niaging barangay eleksyon sanglit gi-free
zone sa mayor ang Mabolo kay ang iyang duha ka kandidato maoy nag-una nga pilion sa katawhan.