NAPATAY NGA PULIS ‘PROTEKTOR’ NI JAGUAR
`NAMALIGYA’ NA OG DRUGS HUMAN MAPATAY ANG KANHI DRUG LORD SA CEBU: PRO 7
Ang napatay nga police official nalakip sa listahan sa Camp Crame nga nalambigit sa illegal nga drugas ug giila nga high value target sa kapulisan sa Central Visayas.
Ang police official napatay sa buy bust operation sa mga sakop sa Counter Intelligence Task Group inabagan sa Drug Enforcement Unit sa Mandaue City Police Office ug Regional Intelligence Branch niadtong Dominggo sa gabii.
Giingong nisukol atol sa buy bust si Police Sr. Inspector Raymond Hortezuela, 35, taga JM Ceniza st. Barangay Looc, siyudad sa Mandaue, kasamtangan nga nadestino sa Negros Oriental Provincial Police Office niadto lang Mayo.
Alas 7:45 Domingo sa gabii sa Barangay Tipolo sa syudad sa Mandaue nahitabo ang giingong buy bust operation sa CITF.
Matod ni Police Regional Office (PRO) 7 director Chief Superintendent Debold Sinas nga sa dihang nakamatikod si Hortezuela nga sama ra niya nga pulis ang iyang gika-transact, nibunot ini sa armas ug maoy unang namusil.
Dinhi na nahitabo ang giingpng pinusilay nga miresulta sa pagkaigo ni Hurtezeula.
Gidala pa siya sa labing duol nga tambalanan sa Mandaue City apan gideklara kini sa mga doktor nga patay na sa pag abot.
Nakuha sud sa iyang sakyanan ang usa ka plastic nga adunay sulod nga 75 ka gagmayng pakete sa gituohang shabu, usa ka kalibre .45 Colt pistol ug usa ka bala niini, P2,000 nga maoy buy bust money.
Lakip sa nakuha ang sling bag nga adunay kwarta nga moabot sa P68,830, duha ka cellular phone, PNP ID, laptop ug uban pang importanteng dokumento nga naa na sa kustodiya sa Counter Intelligence Task Force aron sa pagsusi niini.
Gipanalipdan ni Sinas ang mga pulis nga nakapatay kang Hotezuela sanglit lihitimo kadto nga buy bust operation.
HIGH VALUE TARGET
Iyang gitug-an nga nalakip sa high value target sa ilang internal cleansing ang maong pulis sa dihang nigawas na ang ngalan niini nga nalambigit sa illegal nga drugas.
Niadtong 2006 nasulod sa PNP organization si Hortezeula ug pagka 2012 mi apply pag ka police inspector isip lateral entry ug naaprobahan. Apan niadtong 2016 human mapatay sa mga pulis ang giilang labing dako nga drug lord sa Central Visayas nga si Jeffrey Diaz, alyas “Jaguar,” giingong miapil na kini sa duwa sa illegal nga drugas.
Giila usab siya nga dakong drug personality dinhi sa Sugbo human gilambigit nga protector ni Jaguar sa dihang buhi pa ug nilambo ang negosyo sa drugas.
“Medyo dako-dako. Kasi accordingly, I hope I’m not mistaken, he was reported to be associated or one of the protectors of the group of Jaguar. For the proof we could not show with that one but the intel report will show it,” matod ni Sinas.
GIPANID-AN
Si CITF Information Officer Sr. Inspector Jewel Nicanor nitug-an nga kapin sa usa ka tuig nila nga gipanid-an si Hortezuela sa dihang ilang nadawat ang impormasyon.
Human madawat ang maong kasayuran milusad dayon ang ilang opesina og validation ug sa dihang nasuta nga tinuod, ila dayon nga gilusad ang anti drug operation pinaagi sa buy bust.
Gihulagway usab sa PRO7 si Hortezuela nga idlas ug utokan nga klase sa drug personality sanglit kanunay nga magnegatibo sa pag gamit sa illegal nga drugas kon ilusad sa kapulisan ang kinalit-kalit nga drug test.
Nahimong deputy station commander sa Guadalupe police station ang maong pulis ug niadto lang Mayo ning tuiga nabalhin sa Negros Oriental, apan niadtong Hunyo 8 nananghid nga motambong og hearing dinhi sa syudad sa Sugbo.
Gipahibawo ni Sinas ug CITF nga aduna pay daghang mga pulis nga aktibo pa sa serbisyo ang naa sa ilang listahan nga nagpadayon sa illegal nga kalihukan.
NANGHIMAKAK
Apan ang biyuda ni Hortezuela nanghimakak nga ang iyang bana nalambigit sa illegal drugs.
"If he really was involved in that, then we should have been rich. We should have been living in a mansion,” matod ni Maricel sa interbyu sa GMA 7 Balitang Bisdak.
Ang pamilya sa pulis nipuyo sa balay sa mga ginikanan niini sa Barangay Looc.
Si Hortezuela, matod ni Maricel, mobalik na unta sa iyang trabaho sa Sibulan police station sa Negros Oriental ug nakapalit na gani og ticket.
Di sila motuo nga namusil si Raymond sa mga pulis.
Nangayo sila og hustisya sa kamatayon sa iyang bana.
Si Wilfredo, 53, amahan ni Hortezuela, ug inahan niini nga si Gina, 51, niingon nga di makiangayon nga di ihatag ang benepisyo sa pamilya sa iyang anak.
“He served the organization for 12 years,” matod ni Gina. Matod ni Wilfredo nga nangita pa sila og kwarta alang sa maayong paglubong sa iyang anak.
“He’s a senior inspector. He needs a proper resting place he’s worthy of having,” siya. Ang anak ni Hortezuela magsaulog unta sa iyang birthday karong Biyernes, Hunyo 15.
Apan di na kini mahinayon tungod sa kamatayon sa police official.
Matod ni Wilfredo nga pinangga kaayo sa iyang anak ang iyang apo.
Mao nga sila nagtuo nga di makiangayon nga di hatagan og benipisyo ang iyang anak.