Castillano nasurprisa sa kaminos mibotar sa barangay elections

Gipatan-aw og balik ni Cebu Provincial Election Supervisor Lionel Marco Castillano sa mga election officer ang data sa mga botante nga nisalmot sa miaging barangay ug Sangguniang Kabataan elections.

Siya nasurprisa sa kalit kaubos sa turnout sa mga botante sa bag-ohay lang nga piniliay kon itandi sa nangaging mga eleksyon nga tag-as ang turnout nga moabot og kapin sa 80 porsyento.

Matod niya kasagaran tag-as ang turnout sa barangay election kay mga paryente sa mga botante ang manglansar.

“Mao nang na-surprise gyud ta nga bisan gani ang acting regional director si Atty. (Veronico) Petalcorin gitawgan ko kay gusto niya ipa-review balik ang data kay kalit kaayo nga ubos ba. Surprising ba, niabot na gud ta og 84 (porsyento) to 86 (porsyento), 80 (porsyento) plus na ta pirme unya karon 74 (porsyento) lang,” sumala ni Castillano dihang nahinabi sa Superbalita Cebu kagahapon.

Gikan sa unang napanglantawan nga 85 porsyento, niabot lang og 74.74 porsyento ang turnout sa mga botante nga nisalmot sa piniliay sa barangay, samtang, 71.62 porsyento ang turnout sa SK elections.

Sa data gikan sa Office of the Provincial Election Supervisor (OPES), nasayran nga 2,158,072 ka mga botante ang ningbotar sa piniliay niadtong Mayo 14 gikan sa 2,887,455 nga kwalipikadong mga botante.

Sa maong ihap, 1,021,010 kay mga lalake ug 1,137,062 kay mga babaye.

Samtang, 774,219 (377,599 mga lalake ug 396,620 mga babaye) ang nibotar sa SK elections gikan sa 1,081,008 nga narehistrong mga botante alang sa maong piniliay.

Sa samang data, ang lungsod sa San Remigio maoy nakatala sa labing taas nga turnout nga niabot og 87.72 porsyento diin 34,143 ang nibotar gikan sa 38,924 ka rehistradong mga botante.

Nagsunod ang Alcoy nga 85.17 porsyento, Sibonga 84.50 porsyento ug 84.23 porsyento sa Borbon.

Samtang ang Compostela maoy dunay labing ubos nga turnout nga 60.54 porsyento.

Siya nibutyag nga nag-isyu siya og memorandum sa tanang mga election officer aron i-review og balik kon insakto ba ang nakuha nga mga data.

Mangayo usab siya og opinion sa mga election officer kon nganong niubos ang ningbotar nga mga botante aron makahimo og mga solusyon aron motaas og balik ang voters turnout.

Usa sa iyang nakita nga rason mao ang perception nga dili madayon ang barangay ug SK elections hinungdan nga wala manguli ang ubang mga botante sa ilang mga lugar nga nia nanarbaho sa siyudad sa Sugbo.

“Even sa pila ka days before sa election, naa pay mga estorya nga dili madayon. So, mao seguro nang kulang og interes,” dugang ni Castillano.

Siya nakabantay usab nga lahi ang kampanya sa mga kandidato karon kon itandi sa una diin mubo lang ang campaign period.

Karong Hunyo 23 gipaabot ni Castillano nga makuha ang resulta sa review atol sa ilang post election conference.