Nabuthan sa bomba durugista: pulis

Kadtong lalake nga naunay sa iyang gihimong improvised explosive device (IED) sa barangay Buagsong lungsod sa Cordova niadtong Biyernes sa hapon miyembro kini sa usa ka drug group nga naglihok sa Lapu-lapu, Mandaue ug syudad sa Sugbo.

Anaa pa sa kritikal nga kahimtang si Alijandro Pil, 33, human aksidente nga nabothan sa iyang ginama nga IED.

Matod ni Chief Supt. Debold Sinas ,hepe sa Police Regional Office (PRO) 7, nga gipaandam na niya ang Cordova police station alang na sa pagpasaka og kaso batok kang Pil.

Nakig-alayon na usab siya sa PMP Crime laboratory 7 aron mahimoan og facial composite kadtong mga tawo nga giingong miadto sa ilang balay sa wala pa ang insidente sa pag buto sa bomba.

Sa ilang nakuha nga kasayuran pinaagi sa intelligence report ug background investigation nasuta nga nalambigit sa ilegal nga drugas si Pil. Sakop usab siya sa usa ka drug group diin aduna silay kaaway nga laing drug group nga ang pangulo niini naa sa Mandaue City Jail.

Ang tuyo sa paghimo ni Pil sa mga bomba kini alang sa proteksyon sa ilang kagalingon ug giingong maoy gamiton sa pagpamomba sa ilang karibal sa ilegal nga negosyo. “We are very certain nga si Pil is involve sa druga nya kanang nag-away-away..” matod ni Sinas.

Gipasalig sa heneral ngadto sa publiko nga dili pang terorista ang pag himog bomba sa suspek ug luwas ang rehiyon 7 sa mga bandido.