8 ka drug pushers sa Danao City nasikop

Walo ka mga drug pusher ang nasikop sa kapulisan atol sa ilang gi pahigayon nga sunod-sunod nga buy-bust operation sa mga barangay sa dakbayan sa Danao.

Nadakpan sa kapulisan mao sila si Anthony Nagsuba, 22; Walter Montecalvo, 43; Rodelyn Borja, 35; Espelita Almendras, 37; Rolando Sabas, 41, Ullysses Roble, 50; ug Christian Mangubat, 25; pulos mga residente sa maong lungsod. Ang sunodsunod nga buybust operation gihimo sa Brgy. Cadastral Looc, Brgy. Sabang, Brgy Taboc Camaligbato ug Brgy. Cambanay nga nag sugod pasado alas 8:00 sa gabii niadtong Sabado ug nahuman pasado alas 8:00 sa buntag niadtong Dominggo.

Na recover sa kapulisan gikan sa mga suspek ang 53 ka gagmayng pakete sa gituohang shabu nga motimbang og 2.70 gramos ug P3,200.00 nga giutohang buy-bust money.

Ang Oplan Limpyo Danao II usa ka lakang nga gihimo sa kapulisan sa Danao nga gi panguluhan ni P/SUPT Jaime B. Quiocho Jr. aron sugpuon ang ilegal nga drugas.

Ang mga suspek nagtingkagol karon sa Danao City lock-up facility ug gikatagdang pasakaan sa tukmang kaso.

Sa dakbayan sa Talisay, nasikop ang usa ka drug pusher atol sa drug-bust operation sa Talisay-Drug Enforcement Unit (DEU) nga gipangulohan ni OIC, PSupt Marlu Palomaria Conagiadtong Sabado pasado alas 11 sa buntag didto sa Barangay Tangke.

Ang suspek giila nga si Jessie Rafanan Cabanes, 38, molupyo sa Sitio Tunga, Tangke, Talisay kinsa target sa gihimo nga operasyon.

Atol sa operasyon, nakuha sa posisyon ni Cabanes ang 30 ka gagmay nga pakete sa gituohang shabu lakip na ang duha ka P100 nga kwarta ug usa ka piraso nga pakete sa shabu. Nitimbang ang maong shabu og 1.5 ka gramos ug gibanabana nga mobalor og P15,000.

Human sa pagkasikop sa drug pusher, nadakpan sab sa kapolisan ang usa ka drug dependent nga si Milagros Darsico Rafanan, sa hingkod nga pangedaron ug residente sa nahisgutang dapit .

Ang mga dinakapan nabalhog karon sa Talisay City Lock-up Cell.