Nakaminos sa mga Sugboanon

Hangtod karon padayon pa ang panaglantugi kon ihinayon ba kining Bus Rapid Transit (BRT) sa Sugbo, ang proyekto nga gipangamahanan ni Cebu City Mayor Tomas Osmena nga gituohan nga makatabang sa pagsulbad sa kahuot sa dagan sa trapiko dinhi sa dakbayan. Apan nakabaton kini og oposisyon gikan sa pipila ka mga sektor nga daw sa gisakyan sab sa pipila ka mga pulitiko tungod sa ka gagmay sa mga kalsada nga maagi-an niini.

Nalantawan sa mga kritiko nga imbis makatabang, tingali makapasamot pa hinuon sa problema ilabi na og way road widening nga mahitabo.

Si Transportation Secretary Arthur Tugade, sa niaging semana, mipahibawo didto sa kongreso nga tungod sa kagip-it sa mga dalan, hayan madelatar ang pagpatuman sa BRT project sa Cebu o kaha makanselar kini.

Pero tan-awa ra ni si Kongresista Bayani Fernando sa 1st District sa Marikina City. Matod pa ni Fernando nga kay madelatar o makanselar man kaha ning proyektoha, mas maayo pa kuno nga ang pundo niini i-divert na lang sa Manila aron idugang sa gasto pagpatuman sa ilang BRT project didto sa Kaulohan nga naaprobahan na.

Pagka way batasan ning kongresistaha. Ang pundo nga alang unta sa pagsulbad sa problema dinhi sa Sugbo adto niya ipagasto sa Manila? Unsa may pagtuo ug pagtan-aw niya sa mga Sugboanon?

Imposibli man tuod ni mga mahitabo kay daghan mang mobabag niini, pero ang gipakita ni Fernando naghatag og bati ug hilas nga mensahe alang sa mga Sugboanon. Usa kini ka dakong insulto ug tamparos sa Sugbo.

Ubos ra kaayo sa iyang pag-tan-aw ang mga Sugboanon. Angay ni siya nga i-ban sa Sugbo.