Gawasnon na ba gyud ang Pinoy?

Atong gisaulog karon ang ika-120 ka tuig nga kasumaran sa pagkab-ot nato og kaugalingnan o kagawasan gikan sa mga kamot sa mga langyaw. Gidumala ug gidominar kita sa mga kamot sa Espanya human madiskobre ang atong nasud mga lima ka siglo na ang nakalabay. Nahimo kitang ulipon sa mga langyaw bisan kon ania kita sa atong kaugalingong yuta.

Mao kadtong atong giila nga mga bayani sama ni Lapulapu nga maoy unang nakig-away sa mga langyaw dinhi mismo sa atong nataran. Nasundan si Lapulapu og daghang pang mga bayani nga nakigbisog gihapon sa mga langyaw pinaagi sa hilum, malinawon ug dugoon nga rebolusyon. Sama sa atong gi-ilang nasudnong bayani nga si Dr. Jose Rizal, Andres Bonifacio, Apolinario Mabini, Juan ug Antonio Luna ug daghang pang uban.

Pero nahimo laging katawanan ang atong kahimtang kay samtang atong gikontra ang mga Espanyol nga modominar kanato, apan ang ilang mga abilidad, batasan ug tinuhuan atong gisagop. Daghan sa atong mga batasan ang gisagop nato gikan sa mga Katsila. Ang ilang tinuhuan nga gigakos ang Simbahang Romano Katoliko mao usab ang atong gihimo. Unya kadtong mga pari kaniadto nga gitawag og nga Friars ang nagdaog-daog kanato.

Human sa mga Espanyol, gidominar usab kita sa mga Amerikano sulod sa pipila ka katuigan. Ato usab nga gisagop ang sistema sa mga Amerikano sama sa atong political system ug edukasyon. Na-americanized usab kita og makadiyot. Dayon misuway usab unta og pagsakop nato ang Japan sa dihang miulbo ang ikaduhang gubat sa kalibutan. .

Karon, gawasnon na ba kita tungod kay ang atong pangagamhanan gidumala naman nato mismo sa atong mga piniling mga opisyal? Dili pa gyud kita hingpit nga gawasnon sa natad sa ekonomiya gumikan kay gigawngan man gihapon kita sa mga adunahang nasud. Usahay mosunod man kita sa ilang kagustuhan gumikan kay kita may nagkinahanglan. Ubos gihapon kita sa ilang diktasyon kay kita may nagpakilimos.