Unsa ang sakit nga depresyon?
Human sa sunodsunod nga pagpakamatay sa mga inilang personalidad sa Amerika, nisaka sa 25-30% ang tawag nga nadawat karon sa Suicide Awareness Hotline.
Base sa pagtuon, depresyon ang nag-unang rason nganong magkutlo sa iyang kinabuhi ang usa ka tawo.
Ang depresyon lainlain og hinungdan. Dunay genetics nga kaliwat sa pamilya, usahay sad sa personalidad nga dili kaagwanta og problema ug iluom na lang.
Tan-awa, ang ubang pamilya wa gani makaon ug nagmantinir lang og asin ang mga anak. Pero kon imong tan-awon sa asiras maorag sila pa ang pinakamalipayon nga binuhat nga imong nakit-an anang adlawa.
Kini hinuong mga sapian ug sakto sa panamit mao pay daling magpadaug sa ilang emosyon.
Sa literal nga pagkasulti, ang depresyon usa ka sakit sa utok. Usa ka mental o psychological disorder.
Ang angay ra gyud buhaton mao nga duna silay maka-estorya nga maoy mopasabot sa ilang sitwasyon.
MGA NAGHIKOG
Dinhi sa Pilipinas, di na maihap ang mga celebrity nga naghikog. Kahinumdom pa mo ni Tyron Perez nga produkto sa talent search sa GMA nga Starstruck?
Nakit-an ang aktor sud sa iyang sakyanan niadtong 2011 nga gituohang nagpusil sa iyang kaugalingon.
Duna sad to’y mga espekulasyon sa laing Starstruck nga si Marky Cielo apan isip respeto sa ilang pamilya wala na ni hisguti.
Ang pinakabatan-on nga artistang naghikog ang 15-anyos nga si Julia Buencamino nga nigawas niadto sa daytime soap opera nga “Oh My G.”
Naa sad toy beauty queen-turned-actress nga si Maria Theresa Carlson nga niambak sa building niadtong 2001.
Ang anak ni anhing Senador Miriam Santiago, ang asawa sa TV anchor nga si Ted Failon, si Judge Martin Ocampo, si Defense secretary Angelo Reyes maoy pipila lang sa mga biktima sa maong trahedya.
Sakto ang gisulti sa aktres nga si Ryza Cenon, “be nice and be sensitive.” Kay sa simpleng pagpangumusta, basin makatabang kuno ta. Si Ryza niangkon nga niadtong 2015 nisuway sad siya sa paghikog tungod sa depression.
LEBRON JAMES
Ari ta sa NBA beh, expected man gyud tong kapildihan sa Cleveland Cavaliers. Sa wa pa ang game 1, wa man gani mosukol og pinustahay.
Milagro na kaayo nga nakasud ang Cleveland sa NBA Finals.
Tungod to sa mga miracle shot ni Lebron James.
Bugtong si Kevin Love ray klarong nakatabang ni Lebron. Katong uban dili lehitimong shooter. Ultimo free throw di kasud.
Duha ray posibleng buhaton ni Lebron sunod season: ilisan ang mga players sa Cleveland or mobalhin siya og laing team. /