Just for that moment

Ambot sab ning akong kinaiya, uy. Daghan intawong lalaki nga nahinayak ug naglaom nako. Di man sab nako masabtan ang akong kaugalingon. Morag wa lang sa akong hunahuna ang pagtando sa akong suitor. Parehas kang Syrrel. Nia gyud siya karon sa gisak-an kong boarding house kay makig-dinner siya nako unya. Sunday man gud ron, way klase. Hapon niadtong tungora.

“Sus, Syrrel, sori gyud kaayo, ha. Kalimti na lang tong akong giingon nimo gabii.”

Dunay birthday party sa ilang Joan kagabii. Imbitado ko. Wa man lang sab sa akong hunahuna kon unsay sangpotan sa akong pagtambong. Human sa panihapon, gisugdan dayon ang disco nga diha sa dakong lawn nila ni Joan. Si Joan ang celebrant. Daghan siyag mga bisita. Usa na ani si Syrrel. Si Joan gyud ang nagpaila namo ni Syrrel sa usag usa.

“Aidee, meet my very close friend, Syrrel. Ug, Syrrel, siya si Aidee nga friend ko sab kaayo.”

Human mi ipaila-ila ni Joan si Syrrel sa usag usa, mibiya na siya namo ug giasikaso ang uban pa niyang mga bisita. Parehas mi si Joan nga sakop sa dance group sa university nga among gitunghaan. Sa laing university nagtungha si Syrrel ug silingan sila si Joan sa gipuy-an nga dakong subdivision sa siyudad.

“Shall we dance, Aidee?” “Of course. Why not?”

Kay maayo lagi kong mosayaw, nakadayeg si Syrrel nako.

“Nindota nimong mosayaw, uy, Aidee.”

Naka-smile ko. Nahimuot ko kang Syrrel nga gustong mosundog sa kahumok sa akong lawas apan di gyud siya makahimo. Morag di anad si Syrrel sa mga tokar nga pang-disco.

“Wa man diay isulti ni Joan nimo, no, Syrrel, kon unsa ko? Well, kauban mi si Joan sa dance group sa among eskuwelahan.” “Mao diay.”

Ug misamot kagamay ang mga mata ni Syrrel sa dako niyang smile. Insekon og mga mata si Syrrel nga makapasamot sa iyang kaguwapo kon mokatawa ug mopahiyom siya. Unya, molubyok pa gyud ang duha niya ka dimples sa isig ka aping niya. Hilom kong naka-admire sa iyang ka-attractive.

Tingali, daghan siyag girlfriend, hilom kong nakaingon.

“Ang buot mong ipasabot, Aidee, di diay tinud-anay tong imong pagsugot nako kagabii didto sa ilang Joan?”

Nakapangawot ko sa akong ulo. (SUMPAYAN)