120 ka mga pati gipalupad
Gipalupad sa Police Regional Office 7 ang 120 ka mga pati nga simbolo sa kagawasan atol sa ilang paghandom sa ika 120 ka tuig nga kasumaran sa Adlaw sa Nasudnong Kaugalingnan kagahapong adlawa.
Gisugdan sa pag-isa sa nasudnong bandila ang kalihukan.
Simple nga selebrasyon apan sa unang higayon sa kasaysayan sa kapulisan sa Central Visayas, nagdungan sa pag buhi sa 120 ka mga pati nga nagkahulogan sa kagawasnon sa nasud.
Matod ni PRO 7 Director Chief Supt. Debold Sinas nga human nakab-ot ang kagawasan sa nasud, gawasnon usab ang katawhan sa pagbuhat og uban pa nga nahasubay sa balaod.
Nihagit usab kini sa iyang mga
ginsakpan nga magkinabuhi nga sama sa kinabuhi sa mga bayani.
“Mag ayo-ayo ta og serbisyo. Now, there is always a second chance. Kon gusto mo magbag-o, sugdan nyo na karon. Ayaw nag hulata nga mag-abot pa ta didto sa tumoy. Kon dili mo mag-undang sa inyong dautang panginabuhi, aw mag-abot-abot ta sa tumoy,” matod ni Sinas.
Sa dakbayan sa Sugbo, si Cebu City Mayor Tomas Osmeña sa iyang speech atol sa selebrasyon sa Cebu City hall, nagkanayon nga kining adlawa importanteng iselebrar tungod kay daghan ang nagsakripisyo sa ilang kinabuhi alang sa kagawasan sa nasud.
Mapasigarbuhon usab siya tungod kay giilisan na ang daang bandila sa City Hall og bag-o.
Matod ni Osmeña nga ang nahitabo niadtong Hunyo 12, 1898 sa Kawit, Cavite usa lamang ka deklarasyon ni Emilio Aguinaldo sa kagawasan sa atong nasod./