Duha ka suluguon
Sa karaang panahon sa nasod sa Israel nga gisaysay sa Bibliya, dunay duha ka suluguon nga dili parehas og batasan. Si Gehazi suluguon ni Elisha, usa ka propeta nga mipuli kang Elijah human kini misaka sa langit. Si Jezreel (dili tinuod niya nga ngalan) suluguon sab ni Heneral Naaman nga kumander sa kasundaluhan sa Syria nga higalang nasod sa Israel.
Si Naaman dunay sakit sa panit (nga karon ginganlan nato og sangla). May nakasugyot niya nga paadtuon siya kang Elisha kay kini makatambal o mkaayo sa iyang sakit. Nagdala si Naaman ug usa ka libo nga plata nga kuwarta para ibayad sa propeta kon ugaling mamaayo siya.
Pag-atubang ni Naaman kang Elisha giingnan siya sa propeta nga patusmawon og kapito sa sapa sa Jordan aron mamaayo siya sa iyang sakit.
“Ah! Unsa may nakanindot anang sapa sa Jordan? Lubog man ang tubig diha. Layo ra ‘na sa mga sapa sa Syria!” bagutbot ni Naaman dihang nakabiya na siya sa balay sa propeta uban ni Jezreel.
“Talahuron,” matod ni
Jezreel, “kon ang mananambal mosugo nimo sa pagbuhat og butang nga lisod buhaton, imo gyud kining tumanon aron mamaayo ka. Way mawa nimo kon imo lang tumanon ang sugo sa propeta.”
Hait ang tinan-awan ni Naaman sa iyang suluguon. Nakahunahuna siya sa pagsupo kang Jezreel, “Way nangutana nimo? Kinsa bay nangayo sa imong panahom?” Apan niya ipadayon ang pagsupo sa iyang suluguon, kay may milamdag sa iyang hunahuna. Mitusmao siya’g kapito sa sapa sa Jordan. Pagka human nanindot ang iyang pamanit, nahisama sa kutis sa batang bagong nahimugso. Puwerting lipaya ni Naaman.
Mibalik siya sa balay sa propeta aron ibayad ang iyang dalang kuwarta. Wa modawat niini ang propeta nga miingon, “Way bayranan ang grasya sa Diyos!”
Nakapanglad-ok sa iyang laway si Gehazi nga naminaw sa iyang amo. Gianugnan siya nga wa dawata ni Elisha ang bayad aron unta mapiksan siya.
SAMTANG nagsakay sa iyang tsaryot si Naanam kuyog ni Jezreel aron mopauli sa Syria, gigukod siya
ni Gehazi.
“Dunay miabot nga bisita ang akong amo. Mangayo siya’g kuwarta para ipamalit og idalit sa mga bisita,” matod ni Gehazi kang Naaman.
“Pilay iyang pangayuon?” ni Naaman.
“Lima ka gatos ka plata,” ni Gehazi.
“Dawata ang usa ka libo,” ni Naaman nga malipayong mihatag kang Gehazi sa salapi. Wa siyay kalibutan nga giilad lang siya ni Gehazi.
Paghibalik ni Gehazi sa balay nga ilang gipuy-an ni Elisha gipangutana siya sa iyang amo.
“Diin man diay ka, Gehazi?” ni Elisha.
“Dinhi ra man. Wa man ko molakaw,” pamakak ni Gehazi.
“Ang akong espiritu nakakita nimo nga midawat og kuwarta gikan ni Naaman,” matod ni Elisha. “Busa ang iyang sakit mobalhin nimo ug sa imong kaliwatan!”
Sa iyang nadungog sa iyang amo, nahugno si Gehazi ug gitaptan sa sakit ni Naaman.
Hangtod karon daghan pang mga tawong sanglahon. Tingali mga kaliwat sila ni Gehazi.
Usa kini ka pagtulon-an gikan sa Bibliya nga wala pa ikapamahin ang bulawanong panag-ingnan niini. May suluguon usahay nga makalamdag sa pangisip sa iyang amo, sama ni Jezreel. Dili tanang suluguon minus og pangisip. Apan si Gehazi nahimong bugo tungod sa laraw nga makasapi. Wa kini maghunahuna nga tungod sa abilidad ni Elisha, way malilong kaniya.
(KATAPUSAN)