KAPIN SA P1M NGA DRUGS NASAKMIT
Usa ka ‘high level target’ ang nasikop sa kapulisan atol sa ilang gipahigayong buybust operation sa Brgy. Guadalupe, dakbayan sa Sugbo pasado alas 8 sa gabii niadtong Huwebes.
Ang suspek mao si Ukihiro Abella Zosa, 28, ulitaw ug lumulupyo sa dapit.
Matud ni PO1 Ariel Nuñeza, kinsa maoy gihimong poseur buyer sa kapulisan, unang nasabutan nila sa suspek nga sa Sitio Pailub, Brgy. Sambag 2, dakbayan sa Sugbo nila pagahimuon ang pagpalit sa ilegal nga drugas.
Apan wa kini nagmalampuson human nakamatikod ang suspek sa kapulisan nga naa sa dapit.
Nasabutan nila nga adto na lang pagahimuon ang pagpalit sa ilegal nga drugas sa may Stoplight Store nga naa nahimutang sa may V. Rama-Englis sa Brgy. Guadalupe, Cebu City.
Si P/Insp. Gomersendo Mandawe sa Police Station II, kinsa maoy team leader sa operasyon, daling nakig koordinasyon sa kapulisan sa Guadalupe mahitungod sa ilang gi himo nga operasyon.
Sa saysay ni Nuñeza nga sa dihang nakakita ang suspek sa kwarta nga iyang gidala, kalit kining mihagad kaniya nga aduna pa siyay dakhang stock nga naa sa ilang balay nga nahimutang sa Singson St., Brgy. Guadalupe.
Pag-abot nila sa balay, ang suspek dali mikuha sa iyang giingong stock sa ilegal nga drugas.
Human mitunol ang suspek sa ilegal nga drugas, mideklara na si Nuñeza nga siya pulis ug dali niyang gidakop ang suspek.
Na-recover sa kapulisan gikan sa suspek ang ilegal nga drugas nga mokantidad og P1,121,000.00, usa ka motorsiklo (VIOS VFU 322) ug P9,000.00 nga buy bust money.
Si Zosa, kinsa naa sa listahan sa ‘high value target’ sa kapulisan, giingung maka-dispose og kinilo nga ilegal nga drugas matag semana.
Kasong kalapasan sa R.A 9165, Article II, Section 5 and 11 ang ipasaka nga kaso batok sa suspek.
Samtang nasikop ang upat ka lalaki atol sa drug bust operation sa kapulisan batok sa ilegal nga drugas sa Sitio Acasia, Barangay Quiot, dakbayan sa Sugbo niadtong Huwebes alas 9:30 sa gabii.
Giila ang mga suspek nga sila Joel Obcial Cañeda alyas Wengweng, 38; Ronald Avila Emelda, 30, ug Eleuterio Cansancio Gadiane Jr., 40, nga mga lumulupyo sa Lower Yati, Barangay Quiot, dakbayan sa Sugbo, ug Sonny Boy Grave Marcelino, 33, nagpuyo sa Lawaan 1, dakbayan sa Talisay.
Atol sa operasyon, nakuha sa posisyon gikan sa mga suspek ang duha ka usa ka gatos isip buy bust money, P450 nga gituohang halin sa pagpamaligyag drugas, duha ka disposable lighter, duha ka rolled aluminum foil nga gigamit nga tooter, duha ka strip aluminum foil nga gigamit nga gutter, duha ka rolled paper wick nga gigamit isip burner, upat ka gagmay nga pakite sa gidudahang shabu ug usa ka medium nga pakete sa gidudahang shabu, nga adunay gibana-bana nga gibug-aton nga 6.2 gramos ug ang DDB value nga nagkantidad og P74,400.
Ang estasyon sa kapulisan nagpahigayon og buy-bust operation sa dapit human nakadawat og impormasyon nga adunay ilegal nga patigayon sa gidiling drugas nga nagresulta sa pagdakop sa mga suspek.