GITIPI KAY DAGHAN OG UYAB?

ANGGULONG GISUBAY SA PAGPATAY SA ANAK SA RETIRED POLICE

Anak sa retiradong pulis nga gikan nag-withdraw og kwarta sa ATM machine gipusil patay sa riding in tandem alas 10:45 sa milabayng gabii sa Osmeña Boulevard, Barangay Sambag 1 sa siyudad sa Sugbo.

Ang biktima giila nga si Joseph Bauzon, 42, ulitawo, taga PC Hills, Barangay Lahug, siyudad sa Sugbo, kinsa nakaangkon og pinusilan sa ulo nga milapos sa iyang mata.

Sa imbestigasyon sa Homicide Section sa Cebu City Police Office (CCPO), sakay sa iyang motorsiklo si Bauzon apan kalit lang matod gituparan sa laing nagmotorsiklo ug dayong pusil niini.

Personal nga motibo ang gisubay karon sa kapulisan sanglit wa malambigit sa illegal nga kalihukan si Bauzon sigon sa ilang gihimong back ground investigation.

Matod ni SPO2 Wetzel Berry, imbestigador sa Homicide Section, nga ilang gitan-aw mao ang love triangle tungod kay nakadawat sila'g report nga daghan og hinigugma si Bauzon.

“Personal ni kay sa among impormasyon maayo man daw ni. Anak nig former police ug naa pud ni igsuon nga police, ang among tan-awon ang love affair kay daghan daw nig uyab,” matod ni Berry.

Ipasubay usab nila ang kuha sa mga closed-circuit television camera (CCTV) sa lugar kon duna bay nakakuha niini aron pagsusi sa hulagway sa mga suspek.

Usa sa mga gwardya sa dapit, kinsang ngan gipugngan ning mantalaan, nitug-an sa mga imbestigador nga buto na lang sa armas ang iyang nadungog ug dayong hagsa sa biktima sa karsada.

Wa na niini makita ang mga gunman nga luwan usab og motorsiklo nga nisibat sa wala matino nga direksyon.

Samtang gidunggab patay ang usa ka 42 anyos nga ex-convict ug tiggamitan og illegal nga drugas gahapon sa alas 2:15 sa kaadlawon sa may V. Aranas, Barangay Duljo Fatima, soyudad sa Sugbo.

Ang biktima nga si Christopher Alonzo Bangot, 42, usa ka panday, ug nagpuyo sa maong lugar, nakaangkon og daghang mga samad dinunggaban.

Matod sa asawa sa biktima nga si Imee nga nagbarogbarog lang daplin sa karsada ang iyang bana apan kalit lang nangabot ang duha ka mga lalake ug walay daghang estorya, gidunggab kini sa makadaghang higayon.

Gidali pagdala si Bangot sa sa Cebu City Medical Center apan gideklarar nga dead on arrival.

Gitug-an ni Imee nga nabilanggo na niadtong 2015 ang iyang bana sa kasong illegal possession of firearms, apan sa paggawas niini nagpadayon sa pagsuyop sa illegal nga drugas. /

/ ALAN TANGCAWAN ■GITUPARAN: Gisusi sa Scene of the Crime Operative (SOCO ) ang lawas ni Joseph Bauson, anak sa retired police, kinsa gipusil patay niadtong Biyernes sa mga alas 10 pasado sa gabii sa may eskina Osmeña blvd., ug Uytengsu, dakbayan sa Sugbo. Ang mamumuno nga nagmotorsiklo usab nitupad ra kaniya dihang namusil. Estorya sa pahina 2.